മരണത്തോടെ ജയലളിത നിരപരാധിയായെന്ന്​ തമിഴ്നാട്​ സർക്കാർ 

ചെന്നൈ : അനധികൃത സമ്പാദന കേസിൽ അന്തരിച്ച മുൻ മുഖ്യമന്ത്രി ജയലളിതയെ കുറ്റവാളിയായി കോടതി കണ്ടെത്തിയിട്ടില്ലെന്നും മരണത്തോടെ അവർ നിരപരാധിയാണെന്നും സംസ്​ഥാന സർക്കാർ മദ്രാസ്​ ഹൈകോടതിയിൽ സത്യവാങ്മൂലം നൽകി.  അവർ ജീവിച്ചിരിക്കുേമ്പാഴാണ്​ സ്വത്ത്​ സമ്പാദന കേസിൽ ബംഗളൂരു പ്രത്യേക കോടതിയുടെ ശിക്ഷ കർണ്ണാടക ഹൈകോടതി റദ്ദാക്കി നിരപരാധിയാക്കുന്നത്​​. എന്നാൽ ​ പ്രത്യേക കോടതി വിധി അംഗീകരിച്ചുള്ള സുപ്രീംകോടതിയുടെ തീരുമാനം വരു​േമ്പാൾ അവർ മരണപ്പെട്ടിരുന്നു.  മരണത്തേടെ  പ്രതി പട്ടികയിൽ നിന്ന്​ ഒഴിവാക്കപ്പെട്ടു. ഇൗ സാഹചര്യത്തിൽ ജയലളിത കുറ്റക്കാരിയല്ലെന്ന്​ സംസ്​ഥാന സർക്കാർ പ്രഥമ ബെഞ്ചിന്​ നൽകിയ സത്യവാങ്​മൂലത്തിൽ വ്യക്​തമാക്കി. 

സ്വത്ത് സമ്പാദനകേസിലെ വിചാരണ കോടതി വിധി സുപ്രീംകോടതി ശരിവെച്ച സാഹചര്യത്തിൽ ജയലളിതയുടെ ചിത്രം സർക്കാർ ഓഫീസുകളിൽ നിന്നു നീക്കണമെന്നും സ്​മാരകങ്ങൾ നിർമിക്കുന്നത്​ തടയണമെന്നും ജനക്ഷേമ പദ്ധതികളിൽ നിന്ന് പേര് ഒഴിവാക്കണമെന്നും ആവശ്യപ്പെട്ട് നൽകിയ രണ്ട് പൊതുതാൽപര്യ ഹർജികളിൽ സംസ്ഥാന സർക്കാരിനോട്​  മാർച്ച് 20നകം മറുപടി നൽകാൻ കോടതി നോട്ടീസ്​ അയച്ചിരുന്നു. ഡി.എം.കെ നിയമസഭാംഗം ജെ. അൻപഴകനും അഡ്വക്കേറ്റ്സ്​ ഫോറം ഫോർ സോഷ്യൽ ജസ്​റ്റിസ്​ പ്രസിഡൻറ് കെ. ബാലു  എന്നിവരാണ് ഹർജി നൽകിയത്.  

ജയലളിതയെ കുറ്റക്കാരിയെന്ന് കോടതി കണ്ടെത്തിയതാണെന്നും അങ്ങനെയുള്ളവർ ഭരണഘടനാ സ്​ഥാപനങ്ങളിൽ നിന്ന് മാറ്റിനിർത്തപെടേണ്ടവരാണെന്നും കേന്ദ്ര സർക്കാർ മറുപടി നൽകിയിരുന്നു. മരണം സംഭവിച്ചതോടെയാണ്  ജയലളിതക്ക്​ ജയിൽ വാസത്തിൽ നിന്നും രക്ഷപെടാനായതെന്ന്​ കേന്ദ്ര സർക്കാർ അഭിഭാഷകൻ പി. വിൽസൺ ചൂണ്ടിക്കാട്ടിയിരുന്നു. ജയലളിതയുെട  മരണം സ്വതന്ത്ര ഏജൻസിയെ കൊണ്ട്​ അന്വേഷിപ്പിക്കണമെന്ന പൊതുതാൽപര്യ ഹരജിയിൽ തങ്ങളെ കക്ഷി ചേർത്തത്​ ഒഴിവാക്കണമെന്ന്​ കേന്ദ്രസർക്കാർ കോടതിയോട്​ അഭ്യർഥിച്ചു. പ്രധാനമന്ത്രിയുടെ ഒാഫീസിനെ കേസിൽ കക്ഷി ചേർത്തിരുന്നു.