ഗോവയിൽ വിദേശിയിൽനിന്ന് തട്ടിയത് ഒമ്പത് ലക്ഷം; പൊലീസ് ചമഞ്ഞെത്തിയ സംഘത്തിനായി അന്വേഷണം

പനജി: പൊലീസ് ചമഞ്ഞെത്തിയ സംഘം വിദേശിയിൽനിന്ന് ഡെബിറ്റ്, ക്രെഡിറ്റ് കാർഡുകളും മൊബൈൽ ഫോണും തട്ടിയെടുത്തു. ഗോവയിൽ അവധി ആഘോഷിക്കാനെത്തിയ ജപ്പാൻ സ്വദേശിയാണ് തട്ടിപ്പിനിരയായത്.

ഡിസംബർ 28ന് നോർത്ത് ഗോവ ജില്ലയിലെ സിയോലിം ഗ്രാമത്തിൽവെച്ചായിരുന്നു സംഭവം. തട്ടിപ്പിനിരയായ ജപ്പാൻ സ്വദേശി തത്സൂക്കി തെരമോട്ടോ പൊലീസിൽ പരാതി നൽകി. ഡെബിറ്റ്, ക്രെഡിറ്റ് കാർഡുകൾ ഉപയോഗിച്ച് ഇദ്ദേഹത്തിന്‍റെ അക്കൗണ്ടിൽനിന്നും 9.43 ലക്ഷം രൂപയാണ് കൈക്കലാക്കിയത്.

അൻജുന പൊലീസാണ് അന്വേഷണം നടത്തുന്നത്. തട്ടിപ്പു സംഘത്തെ പിടികൂടാൻ പൊലീസ് പ്രത്യേക സംഘത്തെ നിയോഗിച്ചിട്ടുണ്ട്.