ട്വീറ്റിട്ട്​ ലഭിച്ച ഐ.സി.യു ബെഡും രക്ഷിച്ചില്ല; മാതാവിന്​ പിന്നാലെ കോവിഡിന്​ കീഴടങ്ങി ജാമിയ മില്ലിയ പ്രൊഫസർ

ന്യൂഡൽഹി: ജാമിയ മില്ലിയ ഇസ്​ലാമിയ സർവകലാശാലയിലെ പ്രൊഫസറായ നബീല സാദിഖ്​ കോവിഡ്​ ബാധിച്ച്​ മരിച്ചു. പത്ത്​ ദിവസം​ മുമ്പ്​ നബീലയുടെ 76 കാരിയായ മാതാവിനും കോവിഡ്​ കാരണം ജീവൻ നഷ്​ടമായിരുന്നു. 'തനിക്ക്​ വേണ്ടി​ എവിടെയെങ്കിലും ​െഎ.സി.യു ബെഡ്​ ഉണ്ടോ..?' എന്ന്​ ചോദിച്ചുകൊണ്ട്​ 38 കാരിയായ നബീല മെയ്​ നാലിന് ട്വിറ്ററിലെത്തിയിരുന്നു. മണിക്കൂറുകൾക്ക്​ ശേഷം ബെഡ്​ ലഭിച്ചെങ്കിലും അപ്പോഴേക്കും അവരുടെ ശ്വാസകോശത്തിന്​ വലിയ രീതിയിൽ കേടുപാടുകൾ സംഭവിച്ചിരുന്നു. തിങ്കളാഴ്​ച്ച രാത്രിയായിരുന്നു​ മരിച്ചത്​​.

മെയ്​ നാല്​ വരെ പല ദിവസങ്ങളിലായി നബീല ട്വിറ്ററിൽ ഡൽഹിയിലെ കോവിഡ്​ സാഹചര്യത്തെ കുറിച്ചും രോഗം ബാധിച്ചതിലെ വേവലാതിയെ കുറിച്ചും നിരവധി ട്വീറ്റുകൾ ഇട്ടിരുന്നു. ​െഎ.സി.യു ബെഡിന്​ വേണ്ടിയുള്ളതായിരുന്നു ഏറ്റവും അവസാനത്തെ ട്വീറ്റ്​. മൂന്ന്​ ആശുപത്രികൾ ബെഡില്ലെന്ന്​ പറഞ്ഞ്​ കൈയ്യൊഴിഞ്ഞതിനെ തുടർന്ന്​ ഫരീദാബാദി​ലുള്ള നാലാമത്തെ ആശുപത്രിയിലാണ്​ അതിനുള്ള സൗകര്യം ലഭിച്ചത്​.

Any icu bed leads? For myself.

— Mermaid (@SugarsNSpice) May 4, 2021

പത്ത്​ ദിവസങ്ങൾക്കിടെ ഭാര്യ നുസ്​ഹത്തിനെയും മകൾ നബീലയെയും കോവിഡ്​ മൂലം നഷ്​ടമായതി​െൻറ വേദനയിലാണ്​ 86 കാരനായ മുഹമ്മദ്​ സാദിഖ്​. 'എ​െൻറ ഭാര്യ മരിച്ചപ്പോൾ ഞാൻ കരുതി എനിക്ക്​ മകളുണ്ടല്ലോ എന്ന്​... എന്നാൽ ഇപ്പോൾ ഒരുപിടി ഒാർമകൾ മാത്രമാണ്​ ബാക്കി...' - ചുവരിൽ തൂക്കിയ ഭാര്യയുടെയും മകളുടെയും ചിത്രങ്ങൾ നോക്കി മുൻ ജാമിയ പ്രൊഫസറായ മുഹമ്മദ്​ സാദിഖ്​ കണ്ണീർ പൊഴിച്ചുകൊണ്ട്​ പറഞ്ഞു. കോവിഡ്​ ബാധിച്ച്​ ആശുപത്രിയിലായിരുന്ന നബീലയെ മാതാവ്​ മരിച്ച വിവരം അറിയിച്ചിരുന്നില്ല.

Got it.

— Mermaid (@SugarsNSpice) May 4, 2021

''ഓക്സിജൻ കിടക്ക ലഭിക്കാനായി ദില്ലി-എൻ‌സി‌ആറിലെ എല്ലാ ആശുപത്രികളെയും ഞങ്ങൾ വിളിച്ചിരുന്നു. ഒടുവിൽ ഫരീദാബാദിലെ ഫോർട്ടിസ് ഹോസ്പിറ്റലിൽ കിടക്ക ലഭിക്കാൻ നബീലയുടെ സുഹൃത്തുക്കൾ ഞങ്ങളെ സഹായിച്ചു. അപ്പോഴേക്കും അവരുടെ ഓക്സിജൻ അളവ് 32 ശതമാനമായി കുറഞ്ഞിരുന്നു. സി.ടി സ്​കാനെടുത്ത ശേഷം ഡോക്​ടർ ശ്വാസകോശത്തിൽ കാര്യമായ കേടുപാടുകൾ സംഭവിച്ചതായും പറഞ്ഞു..," -നബീലയുടെ വിദ്യാർത്ഥി വഖാർ എൻ.ഡി.ടി.വിയോട്​ പറഞ്ഞു.