ബംഗാൾ ഗവർണർ ജഗ്ദീപ്​ ധൻഖർ എൻ.ഡി.എ ഉപരാഷ്ട്രപതി സ്ഥാനാർഥി

ന്യൂഡൽഹി: മുഖ്യമന്ത്രി മമത ബാനർജിയുമായി നിരന്തരം ഏറ്റുമുട്ടി വാർത്തകളിലിടം പിടിച്ച പശ്ചിമ ബംഗാൾ ഗവർണർ ജഗ്ദീപ്​ ധൻഖർ ഉപരാഷ്​​ട്രപതി പദവിയിലേക്ക്​. പ്രധാനമന്ത്രി നരേന്ദ്ര മോദിയുടെ സാന്നിധ്യത്തിൽ ഡൽഹി ബി.ജെ.പി ആസ്ഥാനത്ത്​ ചേർന്ന പാർലമെന്‍ററി ബോർഡ്​ യോഗത്തിന്​ ശേഷം​ ബി.ജെ.പി അധ്യക്ഷൻ ജെ.പി നഡ്ഡ രാജസ്ഥാനിൽനിന്നുള്ള ജാട്ട്​ നേതാവായ ധൻഖറിനെ ഉപരാഷ്​ട്രപതി സ്ഥാനാർഥിയായി പ്രഖ്യാപിച്ചു​.

ധൻഖറിനെ 'കർഷക പു​ത്രൻ' എന്ന്​ വിശേഷിപ്പിച്ചാണ്​ സ്ഥാനാർഥി പ്രഖ്യാപനം. എല്ലാവിധത്തിലുള്ള പരിഗണനകൾക്കും കൂടിയാലോചനകൾക്കുമൊടുവിലാണ്​ ധൻഖറിനെ സ്ഥാനാർഥിയാക്കിയതെന്നും ജനകീയ ഗവർണറാണ്​ താനെന്ന്​ അദ്ദേഹം തെളിയിച്ചതാണെന്നും​ നഡ്ഡ വാർത്തസമ്മേളനത്തിൽ പറഞ്ഞു. ഭരണഘടനയെ കുറിച്ച്​ മികച്ച അറിവുള്ള നിയമനിർമാണ കാര്യങ്ങളിൽ നിപുണനാണെന്നും പ്രധാനമന്ത്രി നരേന്ദ്ര മോദി ട്വീറ്റ്​ ചെയ്തു.

ജനതാദളിലൂടെ പാർലമെന്‍ററി രാഷ്ട്രീയത്തിലെത്തി 2003ൽ ബി.ജെ.പിയിൽ ​ചേർന്നയാളാണ്​ ധൻഖർ. രാജസ്ഥാനിലെ ഝുൻഝുനുവിലെ കർഷക കുടുംബത്തിൽ ജനിച്ച്​ സൈനിക്​ സ്കൂളിൽ പഠിച്ച്​ ഫിസിക്സിലും നിയമത്തിലും ബിരുദം നേടി. അഭിഭാഷകനായിട്ടാണ്​ ധൻഖർ ഔദ്യോഗിക ജീവിതം തുടങ്ങുന്നത്​. രാജസ്ഥാൻ ഹൈകോടതിയിലും സുപ്രീംകോടതിയിലും അഭിഭാഷകവൃത്തിയിലേർപ്പെട്ടു.

ഝുൻഝുൻ മണ്ഡലത്തിൽനിന്ന് ജനതാദൾ ടിക്കറ്റിൽ​ 1989ൽ ലോക്സഭയിലെത്തി 1990ൽ കേന്ദ്ര പാർലമെന്‍ററികാര്യ മന്ത്രിയായി. 1991വരെ രണ്ട്​ വർഷമാണ്​ എം.പിയായി ഇരുന്നത്​. 1993ൽ രാജസ്ഥാൻ നിയമസഭയിലേക്ക്​ തെരഞ്ഞെടുക്കപ്പെട്ടിരുന്നു. 2019ൽ പശ്ചിമ ബംഗാൾ ഗവർണറായി.

ലോക്സഭയിലെയും രാജ്യസഭയിലെയും എം.പിമാർ വോട്ടർമാരായ ഉപരാഷ്ട്രപതി തെരഞ്ഞെടുപ്പിൽ 780ൽ 394 വോട്ടുള്ള ബി.ജെ.പിക്ക്​ അനായാസം ജയിക്കാനാകും. ആഗസ്റ്റ്​ ആറിന്​ നടക്കുന്ന വോട്ടെടുപ്പിൽ പ്രതിപക്ഷം ഇതുവരെ സ്ഥാനാർഥിയെ പ്രഖ്യാപിച്ചിട്ടില്ല.