അമർനാഥ്​ യാ​ത്രികർക്കുനേരെ ആക്രമണം; മൂന്ന്​​ പേർ അറസ്​റ്റിൽ

അനന്ത്​നാഗ്​: അമർനാഥ്​ തീർഥാടകർക്കു നേരെ​യുണ്ടായ ആക്രമണവുമായി ബന്ധപ്പെട്ട്​ മൂന്നു​ പേരെ പ്രത്യേക അന്വേഷണ സംഘം അറസ്​റ്റ്​ചെയ്​തു. ആക്രമണം നടത്തിയ നാലു​ ലശ്​​കറെ ത്വയ്യിബ തീവ്രവാദികൾക്ക്​ സഹായം ചെയ്​തുവെന്ന പേരിലാണ്​ ബിലാൽ അഹ്​മദ്​ റെഷി, ​അയ്​ജാസ്​ വാഗെ, സഹൂർ അഹ്​മദ്​ എന്നിവരെ അറസ്​റ്റ്​ ചെയ്​തത്​.

തീവ്രവാദികൾക്ക്​ താമസസ്​ഥലവും വാഹന സൗകര്യവും ഒരുക്കിക്കൊടുത്തത്​ ഇവരാണെന്ന്​ പൊലീസ്​ പറഞ്ഞു. സുരക്ഷാസേന വധിച്ച ലശ്​കർ തീവ്രവാദി ആദിലി​​െൻറ സഹോദരനാണ്​ ബിലാൽ അഹ്​മദ്​. ജൂലൈ പത്തിന്​ അമർനാഥ്​ തീർഥാടനം കഴിഞ്ഞ്​ വന്നവരുടെ ബസിനു നേരെയുണ്ടായ ആക്രമണത്തിൽ എട്ടു​ പേർ മരിച്ചിരുന്നു. പാകിസ്​താൻ സ്വദേശികളെന്ന്​ സംശയിക്കുന്ന രണ്ടു​ പേർക്ക്​ പുറമെ ലശ്​കർ തീവ്രവാദികളായ അബു ഇസ്​മായിൽ, യാവർ എന്നിവരാണ്​ ആക്രമണം നടത്തിയത്​.