അകാരണമായ ശത്രുത ദുഷ്​ടൻമാരുടെ പ്രകൃതം; പാകിസ്​താനെ കടന്നാക്രമിച്ച്​ മോദി

ന്യൂഡൽഹി:  ഇന്ത്യ സൗഹാർദപരമായ ബന്ധം പുലർത്താൻ ശ്രമിക്കുമ്പോഴും പാകിസ്​താൻ ഇന്ത്യയെ പിന്നിൽനിന്ന്​ കുത്താൻ ശ്രമിച്ചുവെന്ന്​ പ്രധാനമന്ത്രി നരേന്ദ്രമോദി. കാർഗിൽ യുദ്ധവിജയത്തിൻെറ 21ാം വാർഷികത്തോടനുബന്ധിച്ച്​ നടത്തിയ മൻ കി ബാത്തിലാണ്​ പ്രധാനമ​ന്ത്രി പാകിസ്​താനെ കടന്നാക്രമിച്ചത്​. 

ആഭ്യന്തര പ്രശ്​നങ്ങളെ വഴിതിരിച്ചുവിട്ട്​ ഇന്ത്യൻ ഭൂപ്രദേശത്തെ പിടിച്ചെടുക്കാനുള്ള കുടില പദ്ധതിയാണ്​ പാകിസ്​താൻ നടപ്പിലാക്കുന്നത്​. എല്ലാവരോടും അകാരണമായി ശത്രുത വെച്ചുപുലർത്തുന്നത്​ ദുഷ്​ടൻമാരുടെ പ്രകൃതമാണ്​. തങ്ങളോട് നൻമ ചെയ്യുന്നവരെപ്പോലും അത്തരക്കാർ തിന്മയായാണ്​ കരുതുക. അതുകൊണ്ടാണ്​ സൗഹാർദപരമായ ഇടപെടലുകൾക്ക്​ പകരമായി പാകിസ്​താൻ ഇന്ത്യയെ പിന്നിൽ നിന്ന്​ ക​ുത്താൻ ശ്രമിച്ചത്​. പക്ഷെ ഇന്ത്യയു​െട ധീരതക്കും ശൗര്യത്തിനും ലോകം സാക്ഷ്യം വഹിച്ചതാണെന്നും ന​േരന്ദ്ര മോദി പറഞ്ഞു.

‘‘മലമുകളിൽ ചേക്കേറിയ ശത്രുവിനെതിരെ​ ഞങ്ങളു​ടെ ​േസന  താഴെ നിന്ന് പോരാടിയത്​ നിങ്ങൾ​ സങ്കൽപിച്ചു​നോക്കൂ. പക്ഷെ ഇന്ത്യൻ സൈന്യത്തിൻെറ ഉയർന്ന ധാർമികതയു​ം സത്യവും മലമുകളിൽ വിജയം കുറിച്ചു. നമ്മുടെ സായുധ സേനയ​ുടെ ധീരതക്ക്​ നന്ദി, ഇന്ത്യ കാർഗിലിൽ വലിയ കരുത്തു കാട്ടി ’’- പ്രധാനമന്ത്രി പറഞ്ഞു.

കാർഗിലിൽ പാക്​ സൈന്യത്തിനെതിരെയുള്ള യുദ്ധ വിജയത്തിൻെറ ഓർമകൾ പുതുക്കുന്നതിനായി എല്ലാ വർഷവും ജൂലൈ 26ന്​ രാജ്യം കാർഗിൽ വിജയ ദിവസമായി ആഘോഷിച്ചു വരുന്നു. ഞായറാഴ്​ച കാർഗിൽ യുദ്ധ വിജയത്തിന്​ 21 വർഷം പൂർത്തിയായിരിക്കുകയാണ്​.

കൊറോണ വൈറസ്​ അതിൻെറ ആരംഭ ഘട്ടമായതിനാൽ തന്നെ ഇപ്പോഴും അപകടകാരിയാണെന്നും ഈ വര​ുന്ന സ്വത​ന്ത്ര്യദിനത്തിന്​ ഏവ​രും കോവിഡിൽ നിന്ന്​ സ്വതന്ത്ര്യം നേടുമെന്ന പ്രതിജ്ഞ എടുക്കണമെന്നും പ്രധാനമന്ത്രി പറഞ്ഞു. 

‘‘കൊറോണ വൈറസ്​ മഹാമാരിയുടെ നടുവിൽ ഈ വർഷം ആഗസ്​റ്റ്​ 15 ​ആഘോഷവും വ്യത്യസ്​തമായ സാഹചര്യത്തിലാണ്​. ഇത്തവണ സ്വാതന്ത്ര്യ ദിനത്തിൽ കോവിഡ്​ മഹാമാരിയിൽ നിന്ന്​ സ്വതന്ത്ര്യം നേടുമെന്ന പ്രതിജ്ഞയെടുക്കാൻ ഞാൻ രാജ്യത്തെ ജനങ്ങളോടും യുവാക്കളോടും ആവശ്യപ്പെടുകയാണ്​.’’ പ്രധാനമന്ത്രി പറഞ്ഞു.