ആഡംബരകപ്പലിലെ റെയ്​ഡും ആര്യൻ ഖാന്‍റെ അറസ്റ്റും; ലക്ഷ്യം വെക്കുന്നത്​ മമത ബാനർജിയെയോ?

മുംബൈ: പശ്ചിമബംഗാൾ തെരഞ്ഞെടുപ്പിൽ തിളക്കമാർന്ന വിജയമായിരുന്നു മുഖ്യമന്ത്രി മമത ബാനർജിയുടെയും തൃണമൂൽ കോൺഗ്രസിന്‍റെയും. അതേസമയം ബി.ജെ.പിക്ക്​ കനത്ത തിരിച്ചടി നേരിടുകയും ചെയ്​തു. എന്നാൽ മമതയുടെ വിജയം ഉയർത്തിക്കാട്ടാതിരിക്കാൻ രാഷ്​ട്രീയപ്രേരിതമാണ്​ ആഡംബര കപ്പലിലെ പരിശോധനയും ഷാരൂഖ്​ ഖാന്‍റെ മകൻ ആര്യൻ ഖാന്‍റെ അറസ്റ്റുമെന്നാണ്​ പ്രതിപക്ഷത്തിന്‍റെ ആരോപണം.

എസ്​.ആർ.കെയിലൂടെ മമത ബാനർജിയെയാണ്​ ലക്ഷ്യം വെക്കുന്നതെന്നും അവർ ആരോപിച്ചു. പശ്ചിമ ബംഗാൾ ബ്രാൻഡ്​ അംബാസിഡറാണ്​ ഷാരൂഖ്​.

ഞായറാഴ്ചയാണ് മുംബൈ തീരത്തെ ആഡംബര കപ്പലിൽ നടന്ന പരിശോധനയിൽ ആര്യൻ ഖാനും സുഹൃത്തുക്കളും അറസ്റ്റിലാകുന്നത്​. ആര്യനെയും രണ്ടു സുഹൃത്തുക്കളെയും മുംബൈ കോടതി പൊലീസ്​ കസ്റ്റഡിയിൽ വിട്ടിരുന്നു. തിങ്കളാഴ്ച ജാമ്യാപേക്ഷ നൽകുമെന്നാണ്​ വിവരം.

അതേസമയം, മുംബൈ ആഡംബര കപ്പലിലെ റെയ്​ഡുമായി ബന്ധപ്പെട്ട എൻ.സി.ബിയുടെ ആവേശം അദാനിയുടെ ഉടമസ്​ഥതയിലുള്ള മുന്ദ്ര തുറമുഖത്തുനിന്ന്​ 3000 കിലോ കൊ​ക്കൊയ്​ൻ പിടിച്ചെടുത്തപ്പോൾ കാണിച്ചി​ല്ലെന്ന്​ കോൺഗ്രസ്​ നേതാക്കൾ വിമർശനം ഉന്നയിച്ചു. 3000 കിലോയുടെ 20,000 കോടി രൂപ വില വരുന്ന ഹെറോയ്​ൻ ആണ്​ ഗുജറാത്തിലെ അദാനിയുടെ ഉടമസ്​ഥതയിലുള്ള മുന്ദ്ര തുറമുഖത്തുനിന്ന്​ പിടിച്ചെടുത്തത്​. രണ്ടു കണ്ടെയ്​നറുകളിലായായിരുന്നു മയക്കുമരുന്ന്​ കടത്ത്​.

'കപ്പലിലെ ആരോപണ വിധേയമായ മയക്കുമരുന്ന്​ പാർട്ടിയിൽ നിസാര അളവിൽ മയക്കുമരുന്ന്​ പിടിച്ചെടുത്തു. എങ്കിലും എൻ.സി.ബിയുടെ സിനിമ സ്​റ്റെൽ പ്രവർത്തനങ്ങൾക്ക്​ മതിയായ പ്രശസ്​തിയും മാധ്യമശ്രദ്ധയും ലഭിച്ചു. എന്നാൽ, 20,000 കോടി രൂപയുടെ മയക്കുമരുന്ന്​ ഇന്ത്യയിലേക്ക്​ എത്തിയപ്പോൾ ഇവർ ഉറങ്ങുകയായിരുന്നു. കുറച്ച്​ ലഭിച്ചപ്പോൾ വളരെ നാടകീയ സംഭവങ്ങള​ും. ഈ അന്വേഷണ ഏജൻസി സ്വതന്ത്രവും കാര്യഗൗരവമുള്ളതുമാണെങ്കിൽ ഗുജറാത്ത്​ തുറമുഖത്ത്​ മയക്കുമരുന്ന്​ എത്തിച്ച പ്രതികളെ പിടികൂടണം. എന്നാൽ പ്രധാനമന്ത്രി നരേന്ദ്രമോദിയുടെ സുഹൃത്ത്​ ഗൗതം അദാനിയുടെ ഉടമസ്​ഥതയിലുള്ള തുറമുഖമായതിനാൽ അവർ പിന്നോട്ടുവലിയുന്നു' -കോൺഗ്രസ്​ വക്താവ്​ സചിൻ റാവത്ത്​ പറഞ്ഞു.

2024ലെ ലോക്​സഭ തെരഞ്ഞെടുപ്പിൽ പ്രധാനമന്ത്രി സ്​ഥാനാർഥിയായി ഉയർത്തിക്കാട്ടുന്ന വ്യക്തിയാണ്​ മമത ബാനർജി. 'ബി.ജെ.പിക്ക്​ മമത ബാനർജിയെ തെരഞ്ഞെടുപ്പിൽ പരാജയപ്പെടുത്താൻ കഴിഞ്ഞില്ല. അതിനാൽ അവരോട്​ അടുത്തുനിൽക്കുന്ന ആളു​കളെ കേന്ദ്ര അന്വേഷണ ഏജൻസികളെ ഉപയോഗിച്ച്​ ലക്ഷ്യം വെക്കുന്നു. പശ്ചിമ ബംഗാളിന്‍റെ ബ്രാൻഡ്​ അംബാസിഡറാണ്​ ഷാരൂഖ്​ ഖാൻ. ഷാരൂഖ്​ ഖാന്‍റെ മകൻ ആര്യൻ ഖാനെ അറസ്റ്റ്​ ചെയ്​തതിലൂടെ മമത ബാനർജിയെയും പശ്ചിമബംഗാളിനെയും അവർ പരോക്ഷമായി ആക്രമിക്കുന്നു. ഏതു നിലയിൽനിന്നും രാഷ്​ട്രീയം കളിക്കാൻ ബി.ജെ.പിക്ക്​ മടിയില്ല' -അടുത്ത വൃത്തങ്ങൾ പറയുന്നു.

യു.പി.എ ഒന്നും രണ്ടു സർക്കാറുകളോടും കോൺഗ്രസ്​ നേതാക്കളോടും അടുത്തബന്ധം പുലർത്തുന്ന വ്യക്തിയാണ്​ ഷാരൂഖ്​. 2014ൽ ബി.ജെ.പി അധികാരത്തിൽ എത്തിയതുമുതൽ, ഷാരൂഖ്​ യാതൊരു രാഷ്​ട്രീയ പ്രതികരങ്ങളോ രാഷ്​ട്രീയചായ്​വോ പ്രകടിപ്പിച്ചിട്ടില്ല. എന്നാൽ ഐ.പി.എൽ ക്രിക്കറ്റ്​ ടീമായ കൊൽക്കത്ത നൈറ്റ്​ റൈഡേർസിന്‍റെ ഉടമയായതിനാൽ മുഖ്യമന്ത്രി മമത ബാനർജിയുമായി ഷാരൂഖ്​ അടുപ്പം പുലർത്തിയിരുന്നു.