ജാമിഅ വിദ്യാർഥിക്ക്​ പരീക്ഷയെഴുതാൻ ഇടക്കാല കസ്​റ്റഡി ജാമ്യം

ന്യൂഡൽഹി: കഴിഞ്ഞ വർഷം ഡൽഹിയിൽ നടന്ന വംശീയാതിക്രമവുമായി ബന്ധപ്പെട്ട്​ അറസ്​റ്റ്​ ചെയ്​ത്​ ജയിലിൽ അടച്ച ഡൽഹി ജാമിഅ വിദ്യാർഥി ആസിഫ്​ ഇഖ്​ബാൽ തൻഹക്ക്​ പരീക്ഷയെഴുതാൻ കർശന ഉപാധികളോടെ ജാമ്യം. ജൂൺ 13ന്​ രാവിലെ മുതൽ രണ്ടാഴ്​ചത്തേക്കാണ്​ ഡൽഹി ഹൈകോടതി ഇടക്കാല കസ്​റ്റഡി ജാമ്യം അനുവദിച്ചത്​. ഈ കാലയളവിൽ ഡൽഹിയിൽ തന്നെയുള്ള ഏതെങ്കിലും ഹോട്ടലിൽ താമസിച്ച്​ പഠിച്ച്​ പരീക്ഷ​​െയഴുതാനാണ്​ നിർദേശം. ജൂൺ 26ന്​ വൈകുന്നേരം തിരിച്ച്​ ജയിലിൽ എത്തണം. ജൂൺ 15 നാണ്​ പരീക്ഷ ആരംഭിക്കുന്നത്​.

സർക്കാറി​െൻറയും തൻഹയുടെയും അഭിഭാഷകർ തമ്മിലുണ്ടാക്കിയ ധാരണയനുസരിച്ച്​, ജയിൽ സൂപ്രണ്ട്​ നിയോഗിച്ച രണ്ട്​ സുരക്ഷാ ഭടൻമാരുടെ കസ്​റ്റഡിയിൽ കൽക്കാജിയിലെ ഹോട്ടലിൽ തൻഹ താമസിക്കും. ഭക്ഷണവും വാടകയും അടക്കം ഈ സമയത്തുള്ള മുഴുവൻ ചെലവുകളും തൻഹതന്നെ വഹിക്കണം. ഈ ദിവസങ്ങളിൽ കുടുംബാംഗങ്ങളോ സുഹൃത്തുക്കളോ സഹപാഠികളോ മറ്റാരെങ്കിലുമോ സന്ദർശിക്കാൻ പാടില്ല. പരീക്ഷ ഓൺലൈൻ ആയാണ്​ നടക്കുന്നതെന്നതിനാൽ ലാപ്​ടോപ്​, ഇൻറർനെറ്റ്​ കണക്​ഷനുവേണ്ടിയുള്ള ഡോംഗിൾ, ബേസിക്​ മോഡൽ മൊബൈൽ ഫോൺ എന്നിവ ലഭ്യമാക്കാൻ കോടതി നിർദേശം നൽകി. പഠനത്തിനായല്ലാതെ മറ്റൊരാവശ്യത്തിനും ഈ ഉപകരണങ്ങൾ ഉപയോഗിക്കാൻ പാടില്ല.

ലാപ്​ടോപ്പിലെ ബ്രൗസിങ്​ ഹിസ്​റ്ററി, മൊബൈൽ എസ്​.എം.എസുകൾ, ഫോണിലെ കോൾ റെക്കോഡുകൾ എന്നിവ മായ്​ച്ചുകളയാൻ പാടില്ല. ഹോട്ടലിൽ താമസിക്കുന്ന ഓരോ ദിവസവും വീട്ടുകാരുമായോ അഭിഭാഷകനുമായോ 10 മിനിറ്റ്​ വീതം സംസാരിക്കാൻ അനുമതിയുണ്ട്​. ഇടക്കാല കസ്​റ്റഡി ജാമ്യം തുടങ്ങുന്നതിനുമുമ്പുതന്നെ അപേക്ഷകനു വേണ്ട പുസ്തകങ്ങളും വായന, പഠന സാമഗ്രികളും സ്വീകരിക്കാൻ അനുമതിയുണ്ട്​. ആവശ്യമെന്ന് തോന്നുന്നവ നടപടിക്രമങ്ങൾ അനുസരിച്ച് പരിശോധനക്ക്​ വിധേയമാക്കിയശേഷം ജയിൽ സൂപ്രണ്ട് വഴി സെല്ലിൽ എത്തിക്കാം.

ബി.എ (പേർഷ്യൻ) ബിരുദമാണ്​​ തൻഹയുടേത്​. പഠനവിഷയങ്ങൾ കണക്കിലെടുക്കുമ്പോൾ പുസ്തകങ്ങളും വായന സാമഗ്രികളും പേർഷ്യൻ അല്ലെങ്കിൽ അറബി ഭാഷയിലായിരിക്കാമെന്നും അവക്കുള്ള അനുമതി ആ കാരണത്താൽ മാത്രം തടയില്ലെന്നും കോടതി വ്യക്തമാക്കി. താൽക്കാലിക കസ്​റ്റഡി ജാമ്യം വഴി തൻഹക്ക്​ നൽകിയിട്ടുള്ള കാവൽ സ്വാതന്ത്ര്യത്തെ ഒരുതരത്തിലും ദുരുപയോഗം ചെയ്യാനാവില്ലെന്നും കോടതി പറഞ്ഞു. ഇടക്കാല കസ്​റ്റഡി ജാമ്യത്തിൽ ചെലവഴിച്ച കാലയളവ് ജയിലിൽ കിടക്കുന്ന കാലഘട്ടമായി കണക്കാക്കപ്പെടും. പൗരത്വ ഭേദഗതി നിയമത്തി​െൻറ പശ്ചാത്തലത്തിൽ നടന്ന ഡൽഹി വംശീയാതിക്രമത്തി​െൻറ ഗൂഢാ​ലോചനയുടെ ഭാഗമായെന്ന്​ ആരോപിച്ച്​ കഴിഞ്ഞ വർഷം മേയ് 19 നാണ് തൻഹയെ അറസ്​റ്റ്​ ചെയ്തത്.