ശ്രീകോവിലിൽ ദീപാലങ്കാരമല്ല, നൂറുകോടിയു​ടെ നോട്ടലങ്കാരം

 ഇൻഡോർ: ദീപാവലി ദിനത്തിൽ മധ്യപ്രദേശിലെ രത്ലം മഹാലക്ഷമി ക്ഷേത്രത്തിലെത്തുന്നവർ അൽപ്പമൊന്ന് അതിശയിച്ചേക്കാം. കാര്യം മറ്റൊന്നുമല്ല ക്ഷേത്രാലങ്കാരങ്ങൾ പൂർണമായും കറൻസി നോട്ടിലാണ്. ശ്രീകോവിലിൽ വിഗ്രഹമൊഴിച്ച് എല്ലാം നോട്ടിൽ അലങ്കരിച്ചിരിക്കുന്നു. ഭക്തർ വ​ഴിപാടായി സമർപ്പിക്കുന്നവ ​നോട്ടുകൾ കൊണ്ടാണ്​ ക്ഷേത്രത്തി​​​െൻറ അകത്തളം അലങ്കരിച്ചിരിക്കുന്നത്​.  ഭക്തർ ദേവിക്ക്​ സമർപ്പിക്കുന്ന സ്വർണം, വെള്ളി ആഭരണങ്ങൾ, പാത്രങ്ങൾ, മുത്തുമാലകൾ തുടങ്ങി അമൂല്യ രത്​നങ്ങൾ വരെ ശ്രീകോവിൽ അലങ്കാരത്തിന്​ ഉപയോഗിച്ചിരിക്കുന്നു. പണവും സവർണവും മറ്റുമായി 100 കോടിയിലധികം മൂല്യമാണ്​ ശ്രീകോവിൽ അലങ്കാരത്തിനുള്ളത്​. 

ദീപാവലി ദിനത്തിലാണ്​ ക്ഷേത്രത്തി​​​െൻറ ശ്രീകോവിൽ സ്വർണവും പണവുമുപയോഗിച്ച്​ അലങ്കരിക്കാറുള്ളത്​. അന്ന്​ ദർശനം നടത്തുന്നവർക്ക്​ ​​െഎശ്വര്യവും സമ്പത്തുമുണ്ടാകുമെന്നാണ്​ വിശ്വാസം. 

ക്ഷേത്രത്തിൽ എത്തുന്ന ഭക്തർ പണവും, സ്വർണവുമടക്കം തങ്ങളുടെ  പക്കലെ വിലപിടിപ്പുള്ളതെല്ലാം ദേവിക്ക് സമർപ്പിക്കാറുണ്ട്​. മുഖ്യതന്ത്രി  ഇവ ക്ഷേത്രത്തിന്‍റെ ശ്രീകോിലിൽ സൂക്ഷിക്കുകയാണ്​ പതിവ്​. എന്നാൽ ദിവസം തോറുമുള്ള ഭക്തരുടെ വരവുമൂലം ഇവ സൂക്ഷിക്കാൻ പലപ്പോഴും സ്ഥലം തികയാറില്ല. ഭക്തരുടെ വഴിപാടുകൾ ക്ഷേത്രത്തിലെ രജിസ്​റ്ററിൽ കണക്കാക്കിയ ശേഷമാണ്​ ഇത്​ ശ്രീകോവിലിൽ സൂക്ഷിക്കുന്നത്​. 

ദീപാവലി ദിനത്തിലെ ഭക്തരുടെ തിരക്കും ക്ഷേത്രാലങ്കാരത്തിലെ ​സവിശേഷതയും കണക്കിലെടുത്ത്​  ഇവിടെ പൊലീസ്​ സുരക്ഷ  കർശനമാക്കിയിട്ടുണ്ട്​. 
 എല്ലാവർഷവും ദീപാവലി ദിനത്തിൽ ക്ഷേത്രത്തിൽ പ്രത്യേക പൂജകളും മറ്റാചാരങ്ങളും തുടർന്നുവരുന്നതിനാൽ  വിവിധയിടങ്ങളിൽ നിന്നായി ആയിരക്കണക്കിന് ഭക്തരാണ് ഇവിടെ എത്തിച്ചേരുന്നത്.