ഇന്ത്യൻ കപ്പലിന് നേരെയുള്ള കടൽകൊള്ളക്കാരു​ടെ ആക്രമണം നാവികസേന തകർത്തു 

ന്യൂഡൽഹി: ഗൾഫ്​ ഒാഫ്​ ഏദനിൽ ഇന്ത്യൻ ചരക്കുകപ്പലിനു നേരെ കടൽക്കൊള്ളക്കാർ നടത്തിയ ആക്രമണം നാവികസേന തകർത്തു. നാവികസേനാ യുദ്ധകപ്പലായ ഐ.എൻ.എസ്​ ത്രിശൂലിലെ ചേതക് ഹെലികോപ്​റ്ററും നാവിക കമാൻഡോകളുമാണ് കൊള്ളക്കാരെ തുരത്തിയത്​.

വെള്ളിയാഴ്​ച  ഉച്ചക്ക്​ 12.30ഒാടെ ഗൾഫ്​ ഒാഫ്​ ഏദനിലായിരുന്നു സംഭവം. ഇന്ത്യൻ ചരക്കു കപ്പലായ എം.വി ജാഗ്​ അമറിന് നേരെയാണ്​ കടൽക്കൊള്ളക്കാർ അപ്രതീക്ഷിത ആക്രമണം നടത്തിയത്​. തുടർന്ന് 26 ഇന്ത്യക്കാരടങ്ങിയ ഇന്ത്യൻ പതാകയേന്തിയ ചരക്കു കപ്പലിൽ നിന്ന്​ അപകടവിവരം നാവികസേനക്ക് ലഭിച്ചു. സന്ദേശം ലഭിച്ച ഉടൻ ആയുധധാരികളായ 12 അംഗ കൊള്ളക്കാരുടെ സംഘത്തെ നേരിടാൻ െഎ.എൻ.എസ്​ ത്രിശൂൽ എത്തുകയായിരുന്നു. 

കടൽക്കൊള്ളക്കാരുടെ ആക്രമണം തടയാനുള്ള അന്താരാഷ്​ട്ര ശ്രമങ്ങൾ പുരോഗമിക്കുമ്പോഴും ആഫ്രിക്കയുടെ കിഴക്കു പടിഞ്ഞാറൻ  തീരങ്ങളിൽ ചരക്കു കപ്പലുകൾക്കും എണ്ണ കപ്പലുകൾക്കും നേരെ ആക്രമണങ്ങൾ തുടരുകയാണ്​. ഇന്ത്യൻ കപ്പലുകൾക്ക് നേരെയുള്ള ആക്രമണം തടയാൻ 2008 മുതൽ യുദ്ധക്കപ്പലുകൾ ഗൾഫ്​ ഒ ാഫ്​ ഏദനിൽ വിന്യസിച്ച് നാവികസേനാ പെട്രോളിങ് നടത്തുന്നുണ്ട്.  

കഴിഞ്ഞ ഏപ്രിലിലാണ് നാവികസേനയുടെ െഎ.എൻ.എസ്​ മുംബൈ, െഎ.എൻ.എസ്​ ടർകാഷ്​, െഎ.എൻ.എസ്​ ത്രിശ​ൂൽ, െഎ.എൻ.എസ്​ ആദിത്യ എന്നീ യുദ്ധകപ്പലുകൾ മെഡിറ്ററേനിയൻ കടലിൽ വിന്യസിച്ചത്. ഈ നീക്കത്തിനിടെ എം.വി ഒ.എസ്​ 35 എന്ന ചരക്കു കപ്പലിന് നേരെയുണ്ടായ കടൽകൊള്ളക്കാരുടെ ആക്രമണം സേന തകർത്തിരുന്നു. മേയിൽ ​െഎ.എൻ.എസ്​ ഷർധ നടത്തിയ സൈനിക നീക്കത്തിൽ ലോർഡ്​ മൗണ്ട്​ ബാറ്റൺ എന്ന ലൈബീരിയൻ ചരക്കു കപ്പലിനെ കടൽക്കൊള്ളക്കാരിൽ നിന്ന്​ രക്ഷപ്പെടുത്തിയിരുന്നു.