കൂരയില്ലാത്ത വയോധികരെ റോഡരികിൽ ഉപേക്ഷിക്കാൻ നഗരസഭ തൊഴിലാളികളു​ടെ ശ്രമം; നാട്ടുകാർ ഇടപെട്ടതോടെ പിൻമാറ്റം

ഇൻഡോർ: കയറിക്കിടക്കാൻ ഇടമില്ലാത്ത വയോധികരെ വാഹനത്തിൽ കയറ്റിക്കൊണ്ടുവന്ന്​ ഹൈവേയിൽ തള്ളാനുള്ള നഗരസഭ തൊഴിലാളികളുടെ നീക്കം തടഞ്ഞ്​ നാട്ടുകാർ. രാജ്യത്തെ ഏറ്റവും മികച്ച ശുചിത്വ നഗരമെന്ന ബഹുമതി നാല്​ തവണ ലഭിച്ച ഇൻഡോറിലെ ക്ഷിപ്ര മേഖലയിലായിരുന്നു​ സംഭവം.

വയോധികരെ ട്രക്കിൽ കയറ്റിക്കൊണ്ടു വന്ന്​ ഹൈവേയിൽ റോഡരികിൽ തള്ളാനായിരുന്നു ശ്രമം. നഗരസഭ തൊഴിലാളികളുടെ കണ്ണില്ലാത്ത ക്രൂരതയുടെ ദൃശ്യങ്ങൾ പുറത്തായിട്ടുണ്ട്​. നാട്ടുകാർ എതിർത്തതോടെ തൊഴിലാളികൾ വയോധികരെ തിരികെ കൊണ്ടുപോവുകയായിരുന്നു. ഇതി​െൻറ ദൃശ്യങ്ങൾ സമൂഹ മാധ്യമങ്ങളിൽ വൈറലാണ്​​.

ഏതാനും പേരുമായെത്തിയ ട്രക്കിൽ നേരാംവണ്ണം ഇരിക്കാനുള്ള ആരോഗ്യം പോലുമില്ലാത്ത മുഷിഞ്ഞ വസ്​ത്രം ധരിച്ച വയോധികയെ ഒരാൾ താങ്ങി പിടിക്കുന്നതും നാട്ടുകാർ തൊഴിലാളികളുമായി തർക്കത്തിലേർപ്പെടുന്നതുമായ ദൃശ്യമാണ്​ പ്രചരിക്കുന്നത്​. നാട്ടുകാരുടെ പ്രതിഷേധത്തിനൊടുവിൽ കൊണ്ടുവന്നവരെ തിരികെ കൊണ്ടുപോകുന്ന വിഡിയോയും പുറത്തായിട്ടുണ്ട്​.

ഭവനരഹിതരെ ഹൈവേ റോഡരികിൽ ഉപേക്ഷിക്കാൻ ശ്രമിച്ചുവെന്ന ആരോപണം ഇൻഡോർ നഗരസഭ അഡീഷണൽ കമീഷണർ അഭയ്​ രജൻഗോക്കർ നിഷേധിച്ചു. ഭവനരഹിതരെ രാത്രികാല അഭയകേന്ദ്രത്തിലേക്ക്​ മാറ്റാൻകൊണ്ടുപോയതാണ്​ തൊഴിലാളികളെന്ന്​ അദ്ദേഹം പറഞ്ഞു.

എന്നിരുന്നാലും ഇൻഡോർ നഗരസഭ ഭരിക്കുന്ന ബി​.ജെ.പിക്കെതിരെ കോൺഗ്രസ്​ ഈ സംഭവം രാഷ്​ട്രീയ ആയുധമാക്കി എടുത്തിട്ടുണ്ട്​.

''ശുചീകരണത്തി​െൻറ പേരിൽ നഗരസഭ തൊഴിലാളികൾ വയോധികരെ തണുപ്പത്ത്​ ഉപേക്ഷിക്കുകയാണ്​. ബി.ജെ.പി അദ്വാനി​യേയും മുരളി മനോഹർ ജോഷിയേയും യശ്വന്ത്​ സിൻഹയേയും പോലുള്ള നിരവധി മുതിർന്ന നേതാക്കളെ ഉപേക്ഷിച്ചതുപോലെ ഉദ്യോഗസ്ഥർ ബി.ജെ.പി ആശയധാരക്കനുസരിച്ച്​ പ്രവർത്തിക്കുകയാണ്​.''-കോൺഗ്രസ്​ വക്താവ്​ നരേന്ദ്ര സലുജ ആരോപിച്ചു.

സംഭവവുമായി ബന്ധപ്പെട്ട്​ രാത്രികാല അഭയകേന്ദ്രത്തി​െൻറ ചുമതലയുള്ള രണ്ട്​ കരാർ ​ജോലിക്കാരെ നഗരസഭ ജോലിയിൽ നിന്ന്​ പുറത്താക്കുകയും നഗരസഭ ഡെപ്യൂട്ടി കമീഷണറെ സസ്പെൻഡ്​ ചെയ്യുകയും ചെയ്​തു. വിഡിയോയിൽ കാണുന്ന ആളുകൾക്കെതിരെ നടപടിയെടുക്കാൻ മുഖ്യമന്ത്രി ശിവരാജ്​ സിങ്​ ചൗഹാൻ ഉത്തരവിട്ടിട്ടുണ്ട്​.

''മുതിർന്ന പൗരൻമാരോടുള്ള മനുഷ്യത്വരഹിതമായ പെരുമാറ്റം യാതൊരുകാരണവശാലും സഹിക്കാൻ പറ്റില്ല. എല്ലാ വയോധികർക്കും ബഹുമാനവും സ്​നേഹവും ലഭിക്കണം.'' -മുഖ്യമന്ത്രി പറഞ്ഞു.