വാക്​സിനെടുക്കാൻ 'കാലനും'; വ്യത്യസ്​തമായി ഒരു വാക്​സിൻ ബോധവത്​കരണം

ഇന്ദോർ: മധ്യപ്രദേശിൽ കോവിഡ്​ പ്രതിരോധ വാക്​സിനെടുക്കാൻ പൊലീസ്​ കോൺസ്റ്റബ്​ൾ എത്തിയത്​ യമരാജൻ കാലന്‍റെ വേഷത്തിൽ. ഇന്ദോറിലെ സർക്കാർ ആശുപത്രിയിലാണ്​ ബുധനാഴ്ച പൊലീസുകാരനായ ജവഹർ സിങ്​ ഈ വേഷത്തിൽ വാക്​സിനെടുക്കാൻ എത്തിയത്​.

മടികൂടാതെ വാക്​സിനെടുക്കാൻ മുൻനിര പോരാളികൾക്ക്​ സന്ദേശം നൽകുന്നതിനാണ്​ കാലന്‍റെ വേഷം ധരിച്ചെത്തിയതെന്ന്​ അദ്ദേഹം പറഞ്ഞു. കാലന്‍റെ വേഷം ധരിച്ച്​ ജവഹർ സിങ്​ വാക്​സിൻ സ്വീകരിക്കുന്ന ചിത്രം സമൂഹ മാധ്യമങ്ങളിൽ വൻതോതിൽ പ്രചരിച്ചു.

കഴിഞ്ഞവർഷം കോവിഡ്​ പടർന്നുപിടിച്ച ഏപ്രിലിൽ കാലന്‍റെ വേഷം ധരിച്ച്​ ജവഹർ സിങ്​ ബോധവത്​കരണത്തിന്​ ഇറങ്ങിയിരുന്നു. അദ്ദേഹത്തിന്‍റെ വിഡിയോ വൈറലാകുകയും ചെയ്​തിരുന്നു.

മധ്യപ്രദേശിൽ പൊലീസ്​ ഉദ്യോഗസ്​ഥർക്ക്​ കോവിഡ്​ വാക്​സിൻ വിതരണം കഴിഞ്ഞ ദിവസം ആരംഭിച്ചിരുന്നു. 50വയസിന്​ മുകളിലുള്ളവർക്കാണ്​ മുൻഗണന.