മിന്നലാക്രമണം: സ്കെച്ചിട്ടത് 'ആകാശത്തിലെ ഇന്ത്യയുടെ കണ്ണ്'

ബംഗളൂരു: പാക് അധീന കശ്മീരിലെ തീവ്രവാദ കേന്ദ്രങ്ങൾക്ക് നേരെ സൈന്യം നടത്തിയ മിന്നലാക്രമണത്തിൽ പങ്കാളിയായത് 'ഇന്ത്യയുടെ കണ്ണ്' എന്ന വിശേഷിപ്പിക്കുന്ന അതിനൂതന ഉപഗ്രഹമായ കാർട്ടോസ്റ്റാറ്റും. തീവ്രവാദികളെയും അവരുടെ പരിശീലന കേന്ദ്രങ്ങളെയും നിരീക്ഷിച്ച് ചിത്രങ്ങൾ ശേഖരിച്ചത് ഐ.എസ്.ആർ.ഒ വിക്ഷേപിച്ച കാർട്ടോസ്റ്റാറ്റ് ശ്രേണിയിലെ 2-സി ഉപഗ്രഹം ഉപയോഗിച്ചാണ്. 'ആകാശത്തിലെ ഇന്ത്യയുടെ കണ്ണ്' എന്നാണ് കാർട്ടോസ്റ്റാറ്റ് ഉപഗ്രഹം അറിയപ്പെടുന്നത്.

മിന്നലാക്രമണം നടത്തുന്നതിന് സേനക്ക് ആവശ്യമായ ഉപഗ്രഹ ചിത്രങ്ങൾ കൈമാറിയതായി ഐ.എസ്.ആർ.ഒ വൃത്തങ്ങളാണ് അറിയിച്ചത്. കഴിഞ്ഞ ഒരാഴ്ച മുതൽ വിവിധ തലത്തിലുള്ള ചിത്രങ്ങൾ ശേഖരിച്ചിരുന്നു. ഈ ചിത്രങ്ങൾ ഉപയോഗിച്ചാണ് സ്ഥലങ്ങളെ കുറിച്ചുള്ള കൃത്യമായ നിഗമനത്തിൽ എത്തിയതെന്നും ഉന്നത ഉദ്യോഗസ്ഥൻ വ്യക്തമാക്കി.

ജമ്മു കശ്മീരിൽ മണ്ണിടിച്ചിൽ ഉണ്ടായ സ്ഥലം കാര്‍ട്ടോസാറ്റ്- 2 ഉപഗ്രഹം പകർത്തിയപ്പോൾ

 

രാജ്യസുരക്ഷയുടെ ഭാഗമായ ഭൗമ നിരീക്ഷണത്തിനാണ് ഐ.എസ്.ആര്‍.ഒ കാർട്ടോസ്റ്റാറ്റ് ശ്രേണിയിലെ ഉപഗ്രഹങ്ങൾ വികസിപ്പിച്ചതും  വിക്ഷേപിച്ചതും. ഈ ശ്രേണിയിലെ നാലാമത്തെ ഉപഗ്രഹമായ കാർട്ടോസ്റ്റാറ്റ് 2 സി 2016 ജൂണ്‍ 22നാണ് പോളാര്‍ സാറ്റലൈറ്റ് ലോഞ്ച് വെഹിക്ളിന്‍റെ (പി.എസ്.എല്‍.വി സി-34) സഹായത്തോടെ ഭ്രമണപഥത്തിൽ എത്തിച്ചത്. അഹമ്മദാബാദിലെ സ്പേസ് ആപ്ലിക്കേഷന്‍സ് കേന്ദ്രത്തിലെ ശാസ്ത്രജ്ഞരാണ് ഉപഗ്രഹം വികസിപ്പിച്ചത്.

കാര്‍ട്ടോസാറ്റ് ഉപഗ്രഹം

 

കാര്‍ട്ടോസാറ്റ്-2 (2007 ജനുവരി 10), കാര്‍ട്ടോസാറ്റ്-2 എ (2008 ഏപ്രിൽ 28), കാര്‍ട്ടോസാറ്റ്-2 ബി (2010 ജൂലൈ 12) എന്നിവയാണ് മുമ്പ് വിക്ഷേപിച്ചവ. ഈ ശ്രേണിയില്‍ മുമ്പ് വിക്ഷേപിച്ചതിനെക്കാള്‍ മൂന്നോ നാലോ മടങ്ങ് ശേഷിയുള്ളതാണ് കാർട്ടോസ്റ്റാറ്റ് 2 സി. 725.5 കിലോ തൂക്കമുള്ള ഉപഗ്രഹത്തിന് ബഹിരാകാശത്തു നിന്ന് ഭൂമിയെ നിരീക്ഷിക്കുകയാണ് പ്രഥമ ദൗത്യം. അയല്‍രാജ്യങ്ങളിലെ സൈനിക നീക്കങ്ങളും മിസൈല്‍ പരീക്ഷണങ്ങളുമെല്ലാം ഇതുവഴി അറിയാനാകും.

കാര്‍ട്ടോസാറ്റ്- 2 ഉപഗ്രഹം പകർത്തിയ ബംഗളൂരു നഗരത്തിന്‍റെ ചിത്രം

 

ശക്തിയേറിയ പാന്‍ക്രോമറ്റിക് കാമറ ഉപയോഗിച്ച് 600 കിലോമീറ്റര്‍ പരിധിയിലെ സൂക്ഷ്മമായ ചിത്രങ്ങളും വിഡിയോയും ഉപഗ്രഹം അയക്കും. കാലാവസ്ഥാ വിശകലനത്തിനും ഇൗ ഉപഗ്രഹം സഹായകമാകും. അടുത്ത വര്‍ഷം കാര്‍ട്ടോസാറ്റ്-2 ശ്രേണിയിലെ മൂന്ന് ഉപഗ്രഹങ്ങള്‍കൂടി വിക്ഷേപിക്കാൻ ഐ.എസ്.ആര്‍.ഒക്ക് പദ്ധതിയുണ്ട്. ഇന്ത്യ കൂടാതെ സൈനിക ആവശ്യത്തിന് ഉപഗ്രഹത്തെ ആശ്രയിക്കുന്ന മറ്റ് രാജ്യങ്ങളാണ് അമേരിക്കയും ചൈനയും.