മകളെ ജർമനിയിൽനിന്ന്​ വിട്ടുകിട്ടണം; മോദിയോടും എസ്​. ജയ്​ശങ്കറിനോടും അഭ്യർത്ഥനയുമായി ദമ്പതികൾ

മുംബൈ: ജർമൻ ബാലാവകാശ കസ്റ്റഡിയിലുള്ള മകളെ വിട്ടുകിട്ടാൻ പ്രധാനമന്ത്രി നരേന്ദ്ര മോദിയും വിദേശകാര്യ മന്ത്രി എസ്​.ജയ്​ ശങ്കറും ഇടപെടണമെന്ന്​ ജർമനിയിൽനിന്ന്​ മുംബൈയിലെത്തിയ മാതാപിതാക്കൾ. വിഷയത്തിൽ ഇന്ത്യൻ അധികൃതർ ഇടപെട്ടാൽ മാത്രമേ മൂന്നുവയസുള്ള മകളെ തിരികെ കിട്ടൂ എന്ന്​ ദമ്പതികൾ പറയുന്നു. പ്രധാനമന്ത്രിയെയും വദേശകാര്യ മന്ത്രിയെയും കാണാനായാണ്​ മാതാപിതാക്കൾ ജർമനിയിൽനിന്ന്​ ഇന്ത്യയിൽ എത്തിയത്​. കുഞ്ഞിനെ തിരികെ കിട്ടാൻ സഹായിക്കണമെന്ന്​ ഇവർ മോദിയോടും ജയ്​ശങ്കറോടും അപേക്ഷിച്ചു. ആവശ്യം ഉന്നയിച്ച്​ ഇവർ കഴിഞ്ഞ ദിവസം മുംബൈയിലെത്തി വാർത്താസമ്മേളനം നടത്തിയിരുന്നു. ഇവരുടെ മൂന്ന് വയസ്സുള്ള മകൾ കഴിഞ്ഞ ഒന്നര വർഷമായി ജർമ്മൻ അധികൃതരുടെ കസ്റ്റഡിയിലാണ്.

വ്യാഴാഴ്ച മുംബൈയിൽ നടന്ന വാർത്താ സമ്മേളനത്തിൽ പെൺകുട്ടിയുടെ അമ്മ ഇത്​ സംബന്ധിച്ച്​ വിശദമാക്കിയിരുന്നു. "2021 സെപ്റ്റംബറിൽ ഞങ്ങളുടെ മകളെ ജർമൻ ചൈൽഡ് സർവീസ് കൊണ്ടുപോയി. കുഞ്ഞിന്‍റെ സ്വകാര്യഭാഗത്ത്​ അബദ്ധത്തിൽ മുറിവേറ്റിരുന്നു. ഞങ്ങൾ അവളെ ഒരു ഡോക്ടറുടെ അടുത്ത്​ കൊണ്ടുപോയി. ഡോക്ടർമാർ ഞങ്ങളെ തിരിച്ചയച്ചു. അവൾ സുഖമായിരിക്കുന്നു. പിന്നെ ഞങ്ങൾ ഒരു തുടർപരിശോധനക്ക്​ വീണ്ടും മകളെ ഡോക്ടറുടെ അടുത്ത്​ എത്തിച്ചു. മകൾക്ക്​ കുഴപ്പമൊന്നുമില്ലെന്ന്​ ഡോക്ടർ ആവർത്തിച്ചു. എന്നാൽ ഡോക്ടർമാർ, അതിനശേഷം ജർമൻ ചൈൽഡ് സർവീസിൽ വിളിച്ച് വിളിച്ച്​ വിവരം പറയുകയും അവർ വന്ന്​ കുഞ്ഞിനെ കൊണ്ടുപോകുകയും ചെയ്​തു.

കുഞ്ഞിന്‍റെ സ്വകാര്യ ഭാഗത്തെ പരിക്കിൽ ലൈംഗീക അതിക്രമം സംശയിച്ചായിരുന്നു അവർ കുട്ടിയെ ചൈൽഡ്​ സർവീസിനെ ഏൽപിച്ചത്​. കൂടുതൽ വ്യക്​തതക്കായി ഞങ്ങൾ ഞങ്ങളുടെ ഡി.എൻ.എ സാമ്പിൾ അടക്കം നൽകി. ഡി.എൻ.എ ടെസ്റ്റ്, പൊലീസ്അന്വേഷണം, മെഡിക്കൽ റിപ്പോർട്ടുകൾ എന്നിവക്കുശേഷം, 2022 ഫെബ്രുവരിയിൽ ലൈംഗിക പീഡനക്കേസ് അവസാനിപ്പിച്ചു. പക്ഷേ, കുഞ്ഞിനെ ഇനിയും തിരികെ കിട്ടിയിട്ടില്ല’’ -കുഞ്ഞിന്‍റെ അമ്മ വാർത്താസമ്മേളനത്തിൽ പറഞ്ഞു.