ഇന്ത്യ-യു.എസ് വ്യാപാര കരാർ അരികെ

ഇന്ത്യ -അമേരിക്ക വ്യാപാര കരാർ യാഥാർഥ്യത്തോട് അടുത്തുവെന്നാണ് റിപ്പോർട്ട്. മിക്കവാറും ഈയാഴ്ച പ്രഖ്യാപനമുണ്ടാകും. ഓഹരി വിപണിക്ക് ഉണർവേകുന്ന വാർത്തയാകും അത്. നേരത്തെ യു.എസ് ഇന്ത്യക്കുമേൽ തീരുവ ഏർപ്പെടുത്തി​യപ്പോൾ തിരിച്ചടി നേരിട്ട മേഖലകളും കമ്പനികളുമാണ് കരാർ യാഥാർഥ്യമായാൽ നേട്ടമുണ്ടാക്കുക.

ടെക്സ്റ്റൈൽ, ആഭരണം, സമുദ്രോൽപന്നങ്ങൾ, മെക്കാനിക്കൽ ഉപകരണങ്ങൾ, ഓർഗാനിക് കെമിക്കൽസ്, കാർപെറ്റ്, ഫർണിച്ചർ, വാഹന ഭാഗങ്ങൾ തുടങ്ങിയവയാണ് ഇന്ത്യയിൽനിന്ന് അമേരിക്കയിലേക്കുള്ള പ്രധാന കയറ്റുമതി. ട്രംപ് തീരുവ പ്രഖ്യാപിച്ചപ്പോൾ ഈ മേഖലയിലെ കമ്പനികളുടെ ഓഹരി വിലയിടിഞ്ഞു. കരാർ യാഥാർഥ്യമാകുന്നതിന് അടുത്തെത്തിയെന്ന വാർത്ത വന്നപ്പോഴേ ഇവയിൽ തിരിച്ചുവരവ് സൂചന കാണുന്നു. ഹ്രസ്വകാല സാധ്യതയുണ്ട്.