രാജ്യത്തിന്​ ആവശ്യമായ 90 ശതമാനം പ്രതിരോധ സാമഗ്രികളുടെയും നിർമാണം ഉടൻ ആരംഭിക്കും -രാജ്​നാഥ്​ സിങ്​

ഝാൻസി: ഇന്ത്യക്ക്​ ആവശ്യമായ 90 ശതമാനം പ്രതിരോധ സാമഗ്രികളുടെയും നിർമാണം രാജ്യത്ത്​ ഉടൻ ആരംഭിക്കുമെന്ന്​ പ്രതിരോധമന്ത്രി രാജ്​നാഥ്​ സിങ്​. 2024-25ഓടെ അഞ്ച്​ ബില്ല്യൺ യു.എസ്​ ഡോളറിന്‍റെ പ്രതിരോധ സാമഗ്രികൾ കയറ്റുമതി​ ചെയ്യുമെന്നും അദ്ദേഹം അറിയിച്ചു. ഉത്തർപ്രദേശ്​ സർക്കാറും കേന്ദ്രസർക്കാറും സംയുക്തമായി സംഘടപ്പിച്ച ത്രിദിന പരിപാടി ഉദ്​ഘാടനം ചെയ്​ത്​ സംസാരിക്കുകയായിരുന്നു അദ്ദേഹം.

'65 മുതൽ 70 ശതമാനം വരെ പ്രതിരോധ സാമഗ്രികൾ ഇന്ത്യയിലേക്ക്​ ഇറക്കുമതി ചെയ്യുന്നു. ആത്മനിർഭർ ഭാരതിലേക്ക്​ മാറിയപ്പോൾ രാജ്യത്തിന്​ ആവശ്യമായ 65 ശതമാനം സാമഗ്രികളും ഇന്ത്യ തദ്ദേശീയമായി നിർമിക്കുന്നു. നേരത്തേ ഒരു ഇറക്കുമതി രാജ്യമായാണ്​ ഇന്ത്യ അറിയപ്പെട്ടിരുന്നത്​. ഇപ്പോൾ 70ഓളം രാജ്യങ്ങളിലേക്ക്​ സാമഗ്രികൾ കയറ്റുമതി ചെയ്യുന്നു. ഇറക്കുമതി 35 ശതമാനം മാത്രവും' -രാഷ്​ട്ര രക്ഷ സമർപൺ പർവ്​ സമ്മേളനത്തെ അഭിസംബോധന ചെയ്​ത്​ കേന്ദ്രമന്ത്രി സംസാരിച്ചു. പ്രധാനമ​ന്ത്രി നരേന്ദ്രമോദിയുടെ ആത്മനിർഭർ ഭാരത്​ പരിശ്രമ ഫലമായാണ്​ ഈ നേട്ടം കൈവരിക്കാൻ സാധിച്ചതെന്നും അദ്ദേഹം പറഞ്ഞു.

രാജ്യത്തെ എല്ലാ പ്രതിരോധ മേഖലകളിലും സ്​ത്രീകളുടെ പങ്കാളിത്തം ഉയർന്നതായി കേന്ദ്രമന്ത്രി അഭിപ്രായപ്പെട്ടു. മോദി സർക്കാർ 2014ൽ അധികാരത്തിൽ വന്നതിന്​ ശേഷം പൊലീസ്​, അർധ സൈനിക സേനകളിൽ സ്​ത്രീകളുടെ പങ്കാളിത്തം വർധിച്ചുവെന്നും അദ്ദേഹം പറഞ്ഞു.