ബുർഹാൻ വാനിയെ പ്രകീർത്തിക്കുന്ന പാക്​ നിലപാടിനെതിരെ ഇന്ത്യ

ന്യൂഡല്‍ഹി: സൈനിക ഏറ്റുമുട്ടലില്‍ കൊല്ലപ്പെട്ട ഹിസ്ബുള്‍ മുജാഹിദീൻ കമാൻഡർ ബുര്‍ഹാന്‍ വാനിയെ പ്രകീര്‍ത്തിക്കുന്ന പാകിസ്താ​ൻ  നിലപാടിനെതിരെ രൂക്ഷ വിമർശവുമായി ഇന്ത്യ. നിരോധിക്കപ്പെട്ട  സംഘടനയുടെ ഭാഗമായ ബുർഹാൻ വാനിയെ പ്രകീര്‍ത്തിക്കുന്ന തരത്തിലുള്ള പാകിസ്താ​​​െൻറ പരാമര്‍ശങ്ങള്‍ അപലപനീയമാണെന്ന് വിദേശകാര്യ മന്ത്രാലയ സെക്രട്ടറി ഗോപാല്‍ ബാഗ്ലെ ട്വിറ്ററിലൂടെ വ്യക്തമാക്കി.

ഭീകരവാദത്തിന് സഹായവും പിന്തുണയും നല്‍കുന്ന പാകിസ്താ​​​െൻറ നടപടിക്കെതിരെ ലോകരാജ്യങ്ങള്‍ ഒരുമിക്കണമെന്നും അദ്ദേഹം അഭ്യര്‍ഥിച്ചു.

First @ForeignOfficePk read frm banned LeT's script. Now Pak COAS glorfs Burhan Wani. Pak's terror suprt&spnsr'p need 2b condmnd by 1 & all

— Gopal Baglay (@MEAIndia) July 9, 2017

 ഭീകര സംഘടനകളില്‍ പ്രവര്‍ത്തിച്ചവരെ പ്രകീര്‍ത്തിക്കുന്ന പാക് നടപടി ഭീകരപ്രവര്‍ത്തനങ്ങള്‍ക്ക് നല്‍കുന്ന പിന്തുണയാണ് വ്യക്തമാക്കുന്നതെന്നും ബാഗ്ലെ ചൂണ്ടിക്കാട്ടി. വാനിയെ പ്രകീർത്തിച്ച പാകിസ്താന്‍ സൈനിക വക്താവ് മേജര്‍ ജനറല്‍ ആസിഫ് ഗഫൂറി​​​െൻറ ട്വീറ്റിനെതിരെയാണ് രൂക്ഷ വിമര്‍ശവുമായി വിദേശകാര്യ മന്ത്രാലയം രംഗത്തെത്തിയിട്ടുള്ളത്.

ശനിയാഴ്ച പാക് പ്രധാനമന്ത്രി നവാസ് ശരീഫും വാനിക്ക്​ ആദരമർപ്പിക്കുകയും  പ്രകീര്‍ത്തിച്ച് സംസാരിക്കുകയും ചെയ്​തിരുന്നു. ബുർഹാൻ വാനിയുടെ മരണം കശ്​മീരിലെ സ്വാതന്ത്ര്യ പോരാട്ടങ്ങൾക്ക്​ പുതിയ ദിശ നൽകിയെന്നാണ്​ ശരീഫ്​ പരാമർശിച്ചത്​.