വൻ ഉത്തേജന പാക്കേജ്​ വേണം: അഭിജിത്​ ബാനർജി

ന്യൂഡൽഹി: കോവിഡിൽ തകർന്നടിഞ്ഞ ഇന്ത്യൻ സമ്പദ്​വ്യവസ്​ഥയെ പുനരുജ്ജീവിപ്പിക്കാൻ വലിയ സാമ്പത്തിക ഉത്തേജന പാക്കേജ്​ തന്നെ വേണ്ടിവരുമെന്ന്​ നൊബേൽ ജേതാവും സാമ്പത്തികശാസ്​ത്ര വിദഗ്​ധനുമായ അഭിജിത്​ ബാനർജി. കോൺഗ്രസ്​ മുൻ പ്രസിഡൻറും എം.പിയുമായ രാഹുൽ ഗാന്ധിയുമായുള്ള വി​ഡിയോ സംഭാഷണത്തിനിടെയായിരുന്നു അദ്ദേഹം ഇങ്ങനെ അഭിപ്രായപ്പെട്ടത്​. 

നാം സാമ്പത്തിക പാക്കേജിനായി വേണ്ടത്ര നീക്കിവെച്ചിട്ടില്ല. ധനവിനിമയമാണ്​ സമ്പദ്​വ്യവസ്​ഥയെ വീണ്ടെടുക്കുന്നതിനുള്ള എളുപ്പമാർഗം. ഇത്​ ഉത്തേജനപാക്കേജി​​​​​​െൻറ ഫലം ചെയ്യും​. ദരിദ്ര വിഭാഗത്തി​​​​​​െൻറ കൈളിലേക്ക്​ നേരിട്ടം പണം എത്തിക്കണം. യു.എസ്​ ഭരണകൂടം ഇതാണ്​ ചെയ്​തു കൊണ്ടിരിക്കുന്നത്​. യു.എസ്​ ജി.ഡി.പിയുടെ 10 ശതമാനമാണ്​ ഇപ്രകാരം നീക്കിവെച്ചത്​-​അദ്ദേഹം വ്യക്​തമാക്കി. 

ജനങ്ങൾക്ക്​ ഭക്ഷണം ഉറപ്പു വരുത്താൻ മൂന്നുമുതൽ ആറുമാസത്തേക്ക്​ കേന്ദ്രസർക്കാർ താൽകാലിക റേഷൻ കാർഡുകൾ അനുവദിക്കണം. രാജ്യത്തെ പാവപ്പെട്ട ജനങ്ങൾക്ക്​ നേരിട്ട്​ പണം കൈമാറുന്നത്​ ചർച്ച ചെയ്യേണ്ട വിഷയമാണ്​. ആധാറി​​​​​​െൻറ അടിസ്​ഥാനത്തിലുള്ള പൊതുവിതരണ സ​മ്പ്രദായം വഴി പാവപ്പെട്ടവരുടെ വിശപ്പ്​ അകറ്റാൻ കഴിയും. ലോക്​ഡൗണിൽ ഇളവുവരുത്തേണ്ടത്​ സൂക്ഷിച്ചുവേണമെന്നും അദ്ദേഹം മുന്നറിയിപ്പു നൽകി. 

ശ്രദ്ധിച്ചു കൈകാര്യം ചെയ്​തില്ലെങ്കിൽ ഒരുപാട്​ പേർ രോഗബാധിതരാകും. ലോക്​ഡൗൺ നീക്കുന്നതിനെ മുമ്പ്​ കോവിഡിനെ കുറിച്ച്​ നമുക്ക്​ വ്യക്തമായ ധാരണയുണ്ടാകണം-അദ്ദേഹം കൂട്ടിച്ചേർത്തു. കോവിഡിനു ശേഷം ഇന്ത്യൻ സമ്പദ്​വ്യവസ്​ഥ എങ്ങനെയായിരിക്കുമെന്നതിനെകുറിച്ച്​ ദേശീയ-രാജ്യാന്തര പ്രമുഖരുമായി രാഹുൽ നടത്തുന്ന രണ്ടാമത്തെ വിഡിയോ സംഭാഷണമാണിത്​. നേരത്തേ റിസർവ്​ ബാങ്ക്​ മുൻ ഗവർണറും സാമ്പത്തിക വിദഗ്​നുമായ രഘുറാം രാജനുമായും രാഹുൽ സംഭാഷണം നടത്തിയിരുന്നു.