മുൻ അഫ്​ഗാൻ ഗവർണർക്ക്​ ഇന്ത്യ അഭയം നൽകും

ന്യൂഡൽഹി: താലിബാൻ നിയ​​ന്ത്രണത്തിലുള്ള അഫ്​ഗാനിൽ നിന്ന്​ രക്ഷപ്പെട്ട മുൻ പ്രവിശ്യ ഗവർണറടക്കം നാലുപേർക്ക്​ ഇന്ത്യ അഭയം നൽകും. ​നയതന്ത്ര പാസ്​​േപാർട്ടിലാണ്​ ഗവർണർക്കും കുടുംബത്തിനും ഇന്ത്യയിൽ പ്രവേശിക്കാൻ പ്രത്യേക അനുമതി നൽകുക.

അഞ്ചു ദിവസം മുമ്പ്​ ദുബൈയിൽ നിന്ന്​ ഡൽഹി ഇന്ദിര ഗാന്ധി വിമാനത്താവളത്തിൽ എത്തിയതായിരുന്നു ഇവർ. അഫ്​ഗാനിസ്​താനിൽ നിന്ന്​ ഇറാനിലേക്കായിരുന്നു ഇവർ ആദ്യം പറന്നത്​. പിന്നീട്​ ദുബൈ വഴി ഇന്ത്യയിലെത്തുകയായിരുന്നു. നയതന്ത്ര പാസ്​പോർട്ടിൽ വിസയില്ലാതെ ഇവർക്ക്​ 30 ദിവസം വരെ ഇന്ത്യയിൽ തങ്ങാം.

മു​മ്പ്​ അഫ്​ഗാൻ മുൻ എം.പി റാഗിന കാർഗർ ​നയതന്ത്ര പാസ്​പോർട്ടുമായി ഡൽഹി വിമാനത്താവളത്തിൽ ഇറങ്ങിയിരുന്നെങ്കിലും രാജ്യത്ത്​ പ്രവേശിക്കാൻ അനുവദിക്കാതെ ഇന്ത്യ ഇവരെ തിരിച്ചയച്ചതിൽ​​ അന്താരാഷ്​ട്ര തലത്തിൽ പ്രതിഷേധം ഉയർന്നിരുന്നു. സംഭവത്തിനു പിന്നാലെയാണ്​ വിദേശകാര്യ മന്ത്രാലയം അടിയന്തര തീരുമാനമെടുത്ത്​ മുൻ ഗവർണർക്കും കുടുംബത്തിനും അഭയം നൽകിയത്​.