ചൈനയെ ലക്ഷ്യം വെച്ച്​ ഇന്ത്യ അത്യാധുനിക മിസൈൽ വികസിപ്പിക്കുന്നുവെന്ന്​  അമേരിക്ക

വാഷിങ്​ടൺ: ചൈനയെ മുഴുവനായും പരിധിയിലാക്കാൻ ശേഷിയുള്ള  മിസൈൽ ഇന്ത്യ തയാറാക്കുന്നുവെന്ന്​ അമേരിക്ക. യു.എസിൽ നിന്നുള്ള ഡിജിറ്റൽ മാസികയായ ‘ആഫ്റ്റർ മിഡ്നൈറ്റി’ൽ പ്രസിദ്ധീകരിച്ച ലേഖനത്തിൽ അമേരിക്കൻ ആണവ വിദഗ്ധർ ഇന്ത്യ അത്യാധുനിക ശേഷിയുള്ള മിസൈൽ വികസിപ്പിക്കുന്നതായി റിപ്പോർട്ട്​ ചെയ്​തിരിക്കുന്നത്​. ദക്ഷിണേന്ത്യയിലെ ബേസുകളിൽനിന്നും ചൈനയെ ലക്ഷ്യമിട്ട് ആണവ സംവിധാനം ആധുനികവൽക്കരിക്കാനുള്ള ശ്രമത്തിലാണ് ഇന്ത്യയെന്ന് ലേഖനം വ്യക്തമാക്കുന്നു.

ആണവായുധത്തിന് ഉപയോഗിക്കാൻ പറ്റുന്നതരത്തിൽ 600 കിലോ പ്ലൂട്ടോണിയം ഇന്ത്യ നിർമിച്ചിട്ടുണ്ടെന്നാണു വിവരം. 150 മുതൽ 200 വരെ ആണവായുധങ്ങൾ നിർമിക്കാനാവശ്യമായ പ്ലൂട്ടോണിയം കൈവശമുണ്ടെങ്കിലും, 120 – 130 വരെ ആണവായുധങ്ങളേ ഇതുവരെ നിർമിച്ചിട്ടുണ്ടാകൂയെന്നും ലേഖനത്തിൽ പറയുന്നു. ഹാൻസ് എം. ക്രിസ്റ്റെൻസെൻ,  റോബർട്ട് എസ്. നോറിസ്​ എന്നിവരാണ്​ ‘ഇന്ത്യൻ നൂക്ലിയർ ഫോഴ്സസ് 2017’ എന്ന തലക്കെട്ടിൽ ലേഖനമെഴുതിയിരിക്കുന്നത്​. 

പാകിസ്​താനെ ലക്ഷ്യം വെച്ചാണ്​ ഇന്ത്യ ആണവ നയം രൂപീകരിച്ചതെങ്കിലും നിലവിലുള്ള ആണവ സംവിധാനം ആധുനികവൽക്കരിക്കാനുള്ള  ഈ നീക്കങ്ങൾ ചൈനയെ ലക്ഷ്യമിട്ടുള്ളതാണ്. നിലവിൽ ഏഴ് ആണവ സംവിധാനങ്ങളാണ് ഇന്ത്യ നിർമിക്കുന്നത്​. 
രണ്ടു വിമാനങ്ങളും നിലത്തുനിന്നു തൊടുക്കാവുന്ന നാല് ബാലിസ്റ്റിക് മിസൈലുകളും കടലിൽനിന്നു വിക്ഷേപിക്കാവുന്ന ഒരു ബാലിസ്റ്റിക് മിസൈലുമാണ് ഇന്ത്യ നിർമിക്കുന്നത്.
ഇതുകൂടാതെ നാല് സംവിധാനങ്ങൾക്കൂടി ഇന്ത്യ വികസിപ്പിക്കുന്നുണ്ട്​. കടലിൽ നിന്നും കരയിൽ നിന്നും വിക്ഷേപിക്കാവുന്ന അതിദൂര മിസൈലുകളാണത്​. അടുത്ത പത്തു വർഷത്തിനുള്ളിൽ ഇവ സേനയുടെ ഭാഗമാക്കി വിന്യസിക്കാൻ സാധ്യതയുണ്ടെന്നും റിപ്പോർട്ടിൽ പറയുന്നു. 
 

വടക്കുകിഴക്കൻ ഇന്ത്യയിൽനിന്ന് ചൈനയിലെ ലക്ഷ്യസ്ഥാനങ്ങളിലേക്കു വിക്ഷേപിക്കാൻ ഉതകുന്നതരത്തിലാണ് അഗ്നി–4​​​​െൻറ നിർമാണം. ചൈനയുടെ പ്രധാന നഗരങ്ങളായ ബെയ്ജിങ്, ഷാങ്ഹായ് എന്നിവയും അഗ്നി–4​​​​െൻറ ദൂരപരിധിയിൽപ്പെടുന്നു. 5000ൽ അധികം കിലോമീറ്ററുകൾ സഞ്ചരിക്കാൻ പര്യാപ്തമായ തരത്തിൽ ഭൂഖണ്ഡാന്തര ബാലിസ്റ്റിക് മിസൈൽ (അഗ്നി 5) ഇന്ത്യ വികസിപ്പിക്കുകയാണ്. പരീക്ഷണഘട്ടത്തിലുള്ള അഗ്നി 5 വിജയകരമായാൽ ഇന്ത്യയുടെ മധ്യ, ദക്ഷിണ മേഖലകളിൽനിന്നു ചൈനയെ ലക്ഷ്യമാക്കി ഇവ വിക്ഷേപിക്കാനാകുമെന്നും ലേഖനത്തിൽ വ്യക്തമാക്കുന്നു.