കോവിഡ്​ രണ്ടാം തരംഗം: മുന്നറിയിപ്പുകൾ കേന്ദ്രസർക്കാർ അവഗണിച്ചുവെന്ന്​ ആരോഗ്യവിദഗ്​ധർ

ന്യൂഡൽഹി: പുതിയ കോവിഡ്​ വകഭേദത്തെ കുറിച്ചുള്ള മുന്നറിയിപ്പ്​ മാർച്ച്​ ആദ്യവാരത്തിൽ തന്നെ കേന്ദ്രസർക്കാറിന്​ ലഭിച്ചുവെന്ന്​ ആരോഗ്യവിദഗ്​ധർ. അതിവേഗത്തിൽ വ്യാപിക്കുന്ന കോവിഡ്​ വകഭേദം ഇന്ത്യയിലെ ഗ്രാമീണ ജില്ലകളിൽ കണ്ടെത്തിയെന്നായിരുന്നു മുന്നറിയിപ്പ്​. ഇതിൽ അടിയന്തര ശ്രദ്ധ വേണമെന്നും നിർദേശിച്ചിരുന്നു.

എന്നാൽ, ഇക്കാര്യത്തിൽ നടപടികളെടുക്കുന്നതിൽ സർക്കാർ പരാജയപ്പെട്ടുവെന്ന്​ പൊതുജനാരോഗ്യ രംഗത്ത്​ 30 വർഷത്തെ അനുഭവ പാരമ്പര്യമുള്ള ഡോ. സുഭാഷ്​ സലുനക പറഞ്ഞു. മഹാരാഷ്​ട്രയിലെ അമരാവതി ജില്ലയിലാണ്​ B.1.617 എന്ന വകഭേദം ആദ്യമായി പടർന്നത്​​. ഫെബ്രുവരി ആദ്യവാരത്തിൽ ഇവിടെ കോവിഡ്​ കേസുകളിൽ വലിയ വർധനയുണ്ടായി. രാജ്യത്ത്​ കോവിഡ്​ രോഗികളുടെ എണ്ണം കുറയു​േമ്പാഴായിരുന്നു ഇത്​. ഇതുസംബന്ധിച്ച് നീതി ആയോഗ്​ അംഗം വി.കെ പോൾ ഉൾപ്പടെയുള്ളവർക്ക്​ മുന്നറിയിപ്പ്​ നൽകിയിരുന്നുവെങ്കിലും അത്​ അവർ കാര്യമായി എടുത്തില്ലെന്ന്​ സലുനക പറഞ്ഞു.

അതേസമയം ഡോ.സുഭാഷ്​ സലുനക വിവരങ്ങൾ പങ്കുവെക്കുക മാത്രമാണ്​ ചെയ്​തതെന്നും മുന്നറിയിപ്പ്​ നൽകിയിട്ടില്ലെന്നും നീതി ആയോഗ്​ അംഗം വി.കെ പോൾ പ്രതികരിച്ചു. വൈറോളജി ഇൻസ്​റ്റിറ്റ്യൂട്ടിനോട്​ പുതിയ വകഭേദം സംബന്ധിച്ച്​ കൂടുതൽ പഠനം നടത്താൻ നിർദേശിക്കണമെന്നാണ്​ സലുനക ആവശ്യപ്പെട്ടതെന്നും വി.കെ പോൾ കൂട്ടിച്ചേർത്തു. എന്നാൽ ഇക്കാര്യത്തിൽ നാഷണൽ വൈറോളജി ഇൻസ്​റ്റിറ്റ്യൂട്ട്​ പഠനം നടത്തിയോയെന്ന്​ വ്യക്​തമാക്കാൻ വി.കെ പോൾ തയാറായില്ല. ഐ.സി.എം.ആറും ഇക്കാര്യത്തിൽ പ്രതികരിച്ചിട്ടില്ല. രാജ്യത്തെ കോവിഡ്​ രോഗികളുടെ എണ്ണം 12,000 ആയി കുറഞ്ഞതിനെ തുടർന്ന്​ മഹാമാരിയെ തോൽപ്പിച്ചതായി മോദി സർക്കാർ പ്രഖ്യാപിച്ചിരുന്നു. ജനുവരിയിലാണ്​ ഇതുസംബന്ധിച്ച പ്രഖ്യാപനം ഉണ്ടായത്​.