കോവിഡ്​ 19: ഇന്ത്യയിൽ 10 ഹോട്ട്​​സ്​പോട്ടുകൾ; കേരളത്തിൽ കാസർകോടും പത്തനംതിട്ടയും

ന്യൂഡൽഹി: കോവിഡ്​ 19 വൈറസ്​ ബാധ അതീവ രൂക്ഷമായ 10 സ്ഥലങ്ങൾ ഹോട്ട്​സ്​പോട്ടുകളാക്കി പ്രഖ്യാപിച്ച്​ കേന്ദ്രസർ ക്കാർ. ദിൽഷാദ്​ ഗാർഡൻ, നിസാമുദ്ദീൻ, നോയിഡ, മീററ്റ്​, ബിൽവാര, അഹമ്മദാബാദ്​, കാസർകോട്​​, പത്തനംതിട്ട, മുംബൈ, പുണെ എന്നിവയാണ്​ ഹോട്ട്​സ്​പോട്ടുകളായി പ്രഖ്യാപിച്ചിരിക്കുന്നത്​.

10 പേർക്ക്​ കോവിഡ്​ ബാധ സ്ഥിരീകരിക്കുന്ന സ്ഥലങ്ങളെ ക്ലസ്​റ്ററുകളായാണ്​ കേന്ദ്രസർക്കാർ പരിഗണിക്കുന്നത്​. ക്ലസ്​റ്ററുകൾ കൂടിചേർന്നതാണ്​ ഹോട്ട്​സ്​പോട്ടുകൾ​. എന്നാൽ, മരണനിരക്ക്​ ഉയർന്നതിനാലാണ്​ അഹമ്മദാബാദിനെ ഹോട്ട്​സ്​പോട്ടായി പ്രഖ്യാപിച്ചത്​. അഞ്ച്​ കേസുകളാണ്​ അഹമ്മദാബാദിൽ സ്ഥിരീകരിച്ചതെങ്കിലും മൂന്ന്​ മരണങ്ങളുണ്ടായി. 100 പേർക്ക്​ ഒരു മരണം എന്നതാണ്​ കോവിഡ്​ വൈറസ്​ ബാധയെ തുടർന്ന്​ ഇന്ത്യയിലുണ്ടാവുന്ന ശരാശരി മരണനിരക്ക്​​. ഇത്​ മറികടന്നതിനാലാണ്​​ അഹമ്മദാബാദിനെ ഹോട്ട്​സ്​പോട്ടായി പ്രഖ്യാപിച്ചതെന്നും കേന്ദ്രസർക്കാർ വ്യക്​തമാക്കിയിട്ടുണ്ട്​.

ഹോട്ട്​സ്​പോട്ടുകളിൽ ​പരിശോധനകൾ വ്യാപകമാക്കും. ഇത്തരം സ്ഥലങ്ങളിലെ നിരീക്ഷണം ശക്​തമാക്കുമെന്നും ​ആരോഗ്യമന്ത്രാലയത്തിലെ ജോയിൻറ്​ സെക്രട്ടറി ലാവ്​ അഗർവാൾ പറഞ്ഞു.