കോവിഡിൽ ചൈനയെ മറികടന്ന്​ ഇന്ത്യ: ലോകത്ത്​ 45 ലക്ഷത്തിലധികം രോഗികൾ

ന്യൂഡൽഹി: കോവിഡ്​ രോഗികളുടെ എണ്ണത്തിൽ കൊറോണ വൈറസിൻെറ ഉത്​ഭവ കേന്ദ്രമായ ചൈനയെയും മറികടന്ന്​ ഇന്ത്യ. ഇതോടെ കോവിഡ്​ രോഗബാധിതരുടെ എണ്ണത്തിൽ ഇന്ത്യ 11ാം സ്​ഥാനത്തെത്തി. 

ഇന്ത്യയിൽ ഇതുവരെ 85,546 പേർക്കാണ്​ കോവിഡ്​ സ്​ഥിരീകരിച്ചത്​. 2746 പേർ മരിക്കുകയും ചെയ്​തു. അതേസമയം, ചൈനയുടെ അത്രയും മരണനിരക്ക്​ ഉയരാത്തത്​ ആശ്വാസമുയർത്തുന്നുണ്ട്​. 3.2 ശതമാനമാണ്​ ഇന്ത്യയുടെ മരണനിരക്ക്​. ചൈനയിൽ ഇത്​ 5.5 ശതമാനമാണ്​. രാജ്യത്ത്​ ഇതുവരെ 27,000 ​ത്തിൽ അധികം പേർ രോഗമുക്തി നേടിയതായും ആരോഗ്യ മന്ത്രാലയം അറിയിച്ചു.  ചൈനയിൽ ഇതുവരെ 82,933 പേർക്കാണ്​ കോവിഡ്​ സ്​ഥിരീകരിച്ചത്​. ഇതിൽ 4633 പേർ മരിച്ചു. 

യു.എസിലാണ്​ ഏറ്റവും കൂടുതൽ കോവിഡ്​ രോഗികളുള്ളത്​. 14,63,301 പേർക്കാണ്​ യു.എസിൽ കോവിഡ്​ ബാധിച്ചത്​. 87,248 പേരാണ്​ യു.എസിൽ മരിച്ചത്​. സ്​പെയിനിൽ 2,74,367 പേർക്കും  റഷ്യയിൽ 2,62,843 പേർക്കും കോവിഡ്​ സ്​ഥിരീകരിച്ചിട്ടുണ്ട്​. 

45 ലക്ഷത്തിലധികം പേർക്കാണ്​  ലോകത്ത്​ ഇതുവരെ കോവിഡ്​ ബാധിച്ചത്​. മൂന്നുലക്ഷത്തിലധികം പേർ മരിക്കുകയും ചെയ്​തു. 17,27,999 പേരാണ്​ രോഗമുക്തി നേടിയത്​.