രാജ്യത്ത് ഏപ്രിലിന് ശേഷമുള്ള ഏറ്റവും കുറഞ്ഞ പ്രതിദിന മരണനിരക്ക്; പുതിയ രോഗികള്‍ 45,951

ന്യൂഡല്‍ഹി: 24 മണിക്കൂറിനിടെ ഇന്ത്യയില്‍ കോവിഡ് സ്ഥിരീകരിച്ചത് 45,951 പേര്‍ക്ക്. 817 പേരാണ് മരിച്ചത്. തുടര്‍ച്ചയായ മൂന്നാംദിവസമാണ് 1000ന് താഴെ മരണം റിപ്പോര്‍ട്ട് ചെയ്യുന്നത്.

ഏപ്രില്‍ 11ന് ശേഷമുള്ള ഏറ്റവും കുറഞ്ഞ പ്രതിദിന മരണനിരക്കാണിതെന്ന് കേന്ദ്ര ആരോഗ്യമന്ത്രാലയം അറിയിച്ചു. ഇതില്‍ മഹാരാഷ്ട്ര-231, തമിഴ്‌നാട്-118 എന്നിങ്ങനെയാണ് മരണസംഖ്യ കൂടിയ സംസ്ഥാനങ്ങള്‍. രാജ്യത്തെ ആകെ മരണസംഖ്യ 3,98,454 ആയി ഉയര്‍ന്നിരിക്കുകയാണ്.

3,03,62,848 പേര്‍ക്കാണ് ഇന്ത്യയില്‍ ആകെ രോഗം ബാധിച്ചത്. ഇതില്‍ 5,37,064 പേരാണ് നിലവില്‍ ചികിത്സയിലുള്ളത്.

പ്രതിദിന രോഗികളുടെ എണ്ണത്തില്‍ കേരളമാണ് ഏറെ മുന്നില്‍. 13,550 രോഗികളാണ് ഇന്നലെ കേരളത്തിലുണ്ടായത്. മഹാരാഷ്ട്ര-8085, തമിഴ്‌നാട്-4512, ആന്ധ്രപ്രദേശ് -3620, കര്‍ണാടക-3222 എന്നിങ്ങനെയാണ് കൂടുതല്‍ രോഗികള്‍ റിപ്പോര്‍ട്ട് ചെയ്ത മറ്റ് സംസ്ഥാനങ്ങള്‍.

ഇന്ത്യയിലെ രോഗമുക്തി നിരക്ക് 96.92 ശതമാനമാണ്. 24 മണിക്കൂറിനിടെ 60,729 പേരാണ് രോഗമുക്തി നേടിയത്.