ചൈന വേണ്ട; തായ്​വാനുമായി വ്യാപാര ചർച്ചകൾ ആരംഭിക്കാൻ ഇന്ത്യ

ന്യൂഡൽഹി: ചൈനയുമായി ബന്ധം വഷളാകുന്നതിനിടെ തായ്​വാനുമായി വ്യാപാരബന്ധം ആരംഭിക്കാൻ ഇന്ത്യ തയാറെടുക്കുന്നതായി വിവരം. ഇന്ത്യയുമായി വ്യാപാര ബന്ധം പ്രോത്സാഹിപ്പിക്കാൻ തായ്​വാൻ ആഗ്രഹിക്കുന്നതായും ചൈനയെ മാറ്റിനിർത്തി തായ്​വാനുമായി ബന്ധം സ്​ഥാപിക്കാൻ ചർച്ചകൾ പുരോഗമിക്കുന്നതായും ദേശീയ മാധ്യമങ്ങൾ പറയുന്നു.

ലോകവ്യാപാര സംഘടനയിൽ രജിസ്​റ്റർ ചെയ്യുന്ന തായ്​വാനുമായുള്ള ഉടമ്പടികൾ ചൈനയുമായുള്ള ബന്ധം കൂടുതൽ വഷളാക്കുമെന്നതിനാൽ കേന്ദ്രസർക്കാർ ഇതിൽനിന്ന്​ വിട്ടുനിൽക്കുകയായിരുന്നു. എങ്കിലും കുറച്ചു മാസങ്ങളായി ഇന്ത്യയും തായ്​വാനും തമ്മിൽ ചർച്ചകൾ നടക്കുന്നുണ്ടെന്ന്​ മുതിർന്ന ഉദ്യോഗസ്​ഥർ പറയുന്നു.

സാ​േങ്കതികവിദ്യയിലും ഇലക്​ട്രോണിക്​സിലും കൂടുതൽ നിക്ഷേപം സാധ്യമാക്കുകയെന്ന ഇന്ത്യയുടെ ലക്ഷ്യം ഇൗ കരാറിലൂടെ സാധിക്കുമെന്ന്​ വിദഗ്​ധർ വിലയിരുത്തുന്നു. നിലവിൽ ചർച്ചകൾ എവിടെവരെയായി എന്ന കാര്യം വ്യക്തമല്ല.

നേരത്തേ തായ്​വാനിലെ ഫോക്​സ്​കോൺ ടെക്​നോളജി ഗ്രൂപ്പും വിസ്​ട്രോൺ കോർപറേഷനും പെഗാട്രോൺ കോർപറേഷനുമായി കരാർ ഒപ്പിടുന്നതിന്​ കേന്ദ്രസർക്കാർ അനുമതി നൽകിയിരുന്നു. പത്തുലക്ഷം കോടിയുടെ കരാറിന്​ പ്രധാനമന്ത്രി ​നരേന്ദ്രമോദി അനുവാദം നൽകിയതായാണ്​ വിവരം.

അതേസമയം, തായ്​വാനുമായുള്ള വ്യാപാര കരാർ സംബന്ധിച്ച്​ പ്രതികരിക്കാൻ കൊമേഴ്​സ്​ മന്ത്രാലയ വക്താവ്​ തയാറായിട്ടില്ല. ചൈനയുടെ സമ്മർദ്ദം മൂലം പ്രധാന സമ്പദ്​വ്യവസ്​ഥകളുമായി വ്യാപാരത്തിലേർപ്പെടാൻ തായ്​വാന്​ സാധിച്ചിരുന്നില്ല. ഇന്ത്യയുമായി വ്യാപാരബന്ധം ആ​രംഭിച്ചാൽ തായ്​വാന്​ ഇത്​ വലിയ നേട്ടമാകും.