അതിർത്തിയിൽ വീണ്ടും ഇന്ത്യ-ചൈന സൈനിക സംഘർഷം; നിരവധി സൈനികർക്ക്​ പരിക്ക്​

ന്യൂഡൽഹി: അരുണാചൽ പ്രദേശിലെ അതിർത്തിയിൽ ഇന്ത്യ - ചൈന സൈനികർ തമ്മിൽ സംഘർഷം. കഴിഞ്ഞ വെള്ളിയാഴ്ചയുണ്ടായ സംഘർഷത്തിൽ നിരവധി സൈനികർക്ക്​ പരിക്കേറ്റുവെന്നാണ് റിപ്പോർട്ട്. കൈകാലുകൾ ഒടിഞ്ഞ ഏതാനും സൈനികർ ഗുവാഹതി ആശുപത്രിയിലാണ്​. ചൈനയുടെ സൈനികർക്കും പരിക്കേറ്റുവെന്നാണ്​ അനൗദ്യോഗികമായി ലഭിക്കുന്ന വിവരം. സംഘർഷത്തെക്കുറിച്ച്​ സേന പ്രതികരിച്ചിട്ടില്ല.

ഏറ്റുമുട്ടൽ നടന്ന സ്ഥലത്ത്​ 600 ചൈനീസ്​ സൈനികർ ഉണ്ടായിരുന്നുവെന്നാണ്​ റിപ്പോർട്ട്​. ഇരു കൂട്ടരും ഏറ്റുമുട്ടൽ പ്രദേശത്തുനിന്ന്​ പിൻവാങ്ങിയിട്ടുണ്ട്​.

ഗൽവാൻ സൈനിക കുരുതിക്കു ശേഷം ഇത്തരമൊരു ഏറ്റുമുട്ടൽ ആദ്യമാണ്​. 2020 ജൂൺ 15നാണ്​ കിഴക്കൻ ലഡാക്കിലെ ഗൽവാൻ താഴ്വരയിൽ ചൈനീസ്​ ലിബറേഷൻ ആർമിയുമായുണ്ടായ ഏറ്റുമുട്ടലിൽ 20 ഇന്ത്യൻ സൈനികർ വീരമൃത്യു വരിച്ചത്​. നിരവധി പേർക്ക്​ പരിക്കേൽക്കുകയും ചെയ്തു. ചൈനയുടെ 40 പേരും മരിച്ചതായാണ്​ റിപ്പോർട്ട്.

അരുണാചൽ പ്രദേശ്​ അതിർത്തി മേഖലയിൽ ഇന്ത്യ-ചൈന സംഘർഷം ആദ്യമല്ല. അതിർത്തി വ്യക്തമായി തിരിക്കാൻ കഴിയാത്ത ഈ മേഖലയിൽ നിരീക്ഷണ യാത്രക്കിടയിൽ സൈനികർ തമ്മിൽ ഉരസൽ ഉണ്ടാകാറുണ്ട്​. 2021 ഒക്​ടോബറിലും സംഘർഷം ഉണ്ടായിരുന്നു.