വാക്​സിൻ ക​െണ്ടത്തിയില്ലെങ്കിൽ ഇന്ത്യയിൽ 70 ശതമാനം പേർക്കും കോവിഡ്​ ബാധിക്കുമെന്ന്​ വിദഗ്​ധർ

ന്യൂഡൽഹി: കോവിഡ്​ മഹാമാരി പ്രതിരോധത്തിനുള്ള വാക്​സിൻ ലഭിച്ചില്ലെങ്കിൽ ഇന്ത്യയിലെ 60 മുതൽ 70 ശതമാനം ജനങ്ങളും വൈറസ്​ ബാധിതരാകുമെന്ന്​ പൊതുജനാരോരോഗ്യ വിദഗ്​ധൻ ഡോ. ഡേവിഡ്​ ബിഷായ്​. ജയ്പൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ഹെൽത്ത് മാനേജ്മ​െൻറ്​  ആൻഡ് റിസർച്ച് (ഐ‌.ഐ‌.എച്ച്‌.എം‌.ആർ) സംഘടിപ്പിച്ച വെബിനാറിൽ നടത്തിയ പ്രസംഗത്തിലാണ്​ ഡോ. ബിഷായ്​ ഇക്കാര്യം വ്യക്തമാക്കിയത്​. 

വാക്സിൻ വികസിപ്പിക്കാൻ 18 മുതൽ 24 മാസം വരെ എടുക്കുമെന്നാണ്​ റിപ്പോർട്ട്​. അപ്പോഴേക്കും ഇന്ത്യയിലെ ജനസംഖ്യയുടെ 60 ശതമാനമെങ്കിലും കോവിഡ്​ ബാധിതരാകാൻ സാധ്യതയുണ്ടെന്നു​ം ഡോ.ബിഷായ്​ ചൂണ്ടിക്കാട്ടി. "ഇന്ത്യൻ സമ്പദ്‌വ്യവസ്ഥയിൽ കോവിഡ്-19​​െൻറ സ്വാധീനം: നയവും  പ്രത്യാഘാതങ്ങളും" എന്ന വിഷയത്തിൽ  നടത്തിയ വെബിനാറിൽ സംസാരിച്ച ഡോ. ബിഷായ്​ ഇന്ത്യ ദരിദ്രരുടെ ആരോഗ്യ കാര്യങ്ങളിൽ കൂടുതൽ ശ്രദ്ധ കേന്ദ്രീകരിക്കേണ്ടതുണ്ടെന്നും ചൂണ്ടിക്കാട്ടി.  ജോൺസ് ഹോപ്കിൻസ് സർവകലാശാലയിലെ ബ്ലൂംബെർഗ് സ്കൂൾ ഓഫ്​ പബ്ലിക്​ ഹെൽത്​ പ്രഫസറാണ്​ ഡോ. ബിഷായ്.

രാജ്യത്തെ സുസ്ഥിര വികസനത്തി​​െൻറ ഏറ്റവും പ്രധാനപ്പെട്ട ഘടകങ്ങളിലൊന്നാണ് ആരോഗ്യം.  കൊറോണ വൈറസ് പ്രതിസന്ധി വലിയ സ്വാധീനം ചെലുത്തുമെന്നതിനാൽ ആരോഗ്യരംഗത്ത്​ അടിസ്ഥാനസൗകര്യങ്ങൾ മെച്ചപ്പെടുത്താൻ ഇന്ത്യ കൂടുതൽ ചെലവഴിക്കേണ്ടതുണ്ടെന്നും അദ്ദേഹം പറഞ്ഞു.  

ഇന്ത്യയിൽ ഇതുവരെ 67,152 പേർക്കാണ്​ കോവിഡ്​ സ്ഥിരീകരിച്ചത്​. വൈറസ്​ ബാധയെ തുടർന്ന്​ 2,206 പേർക്ക്​ ജീവൻ നഷ്​ടമായി.