സാരി ധരിച്ച്​ കാലുകൾ കാണിക്കുന്നത്​ സംസ്​കാരത്തിനെതിര്​; മമതക്കെതിരായ പരാമർശത്തെ ന്യായീകരിച്ച്​ ബി.ജെ.പി നേതാവ്

കൊൽക്കത്ത: പശ്​ചിമബംഗാൾ മുഖ്യമന്ത്രി മമത ബാനർജിക്കെതിരായ ബർമുഡ പരാമർ​ശത്തെ ന്യായീകരിച്ച്​ ബി.ജെ.പി പ്രസിഡന്‍റ്​ ദിലീപ്​ ഘോഷ്​. സാരി ധരിച്ച്​ ദീർഘനേരം കാലുകൾ കാണിക്കുന്നത്​ സംസ്​കാരത്തിനെതിരാണ്​. അതിനാലാണ്​ അവർക്കെതിരെ പ്രസ്​താവനയുമായി രംഗത്തെത്തിയതെന്ന്​ ദിലീപ്​ ഘോഷ്​ പറഞ്ഞു.

മമത നമ്മുടെ മുഖ്യമന്ത്രിയാണ്​. അവർ ഒരു സ്​ത്രീകൂടിയാണ്​. ബംഗാളി സംസ്​കാരത്തെ സംരക്ഷിക്കുന്ന നടപടികളാണ്​​ അവരിൽ നിന്നും ഉണ്ടാവേണ്ടത്​. സാരി ധരിച്ച്​ ഒരു സ്​ത്രീ ദീർഘനേരം കാലുകൾ കാണിക്കുന്നത്​ സംസ്കാരത്തിനെതിരാണ്​. അതിനാലാണ്​ മമതയെ വിമർശിച്ചതെന്ന്​​ ദിലീപ്​ ഘോഷ്​ പറഞ്ഞു.

സ്​ത്രീകളും ​മമതയുടെ പ്രവർത്തി ശരിയല്ലെന്നാണ്​ പറയുന്നത്​​. സമൂഹമാധ്യമങ്ങളിലും ഇതേ അഭിപ്രായമാണുള്ളതതെന്നും അദ്ദേഹം കൂട്ടിച്ചേർത്തു. മമത ഒരു കാൽ മറച്ചും മറ്റൊന്ന്​ പുറത്ത്​ കാട്ടിയുമാണ്​ സാരി ധരിക്കുന്നത്​. ഇങ്ങനെയാരും സാരി ധരിക്കാറില്ല. അവർക്ക്​ കാല്​ കാണിക്കണമെങ്കിൽ ബർമുഡ ഇടണമായിരുന്നുവെന്നായിരുന്നു ദിലീപ്​ ഘോഷിന്‍റെ വിവാദ പ്രസ്​താവന.​