എസ്​.പി നേതാക്കളുടെ വീടുകളിൽ ആദായ നികുതി പരിശോധന; ബി.ജെ.പിയുടെ തെരഞ്ഞെടുപ്പ്​ തന്ത്രമെന്ന്​ നേതാക്കൾ

ലഖ്​നോ: ഉത്തർപ്രദേശിൽ നിയമസഭ തെരഞ്ഞെടുപ്പ്​ അങ്കം മുറുകവേ സമാജ്​വാദി പാർട്ടി നേതാക്കളുടെ വീടുകളിൽ ആദായനികുതി വകുപ്പിന്‍റെ പരിശോധന. എസ്​.പി വക്താവ്​ രാജീവ്​ റായ്​, അഖിലേഷ്​ യാദവിന്‍റെ പേഴ്​സണൽ സെക്രട്ടറി ജൈനേന്ദ്ര യാദവ്​, പാർട്ടി നേതാവ്​ മനോജ്​ യാദവ്​ എന്നിവരുടെ വീടുകളിലും ഓഫിസുകളിലുമാണ്​ പരിശോധന.

അഖിലേഷ്​ യാദവിനോട്​ ഏറ്റവും അടുപ്പമുള്ള നേതാവാണ്​ രാജീവ്​ റായ്​. വാരാണസിയിൽനിന്നുള്ള ആദായനികുതി വകുപ്പിൻറെ സംഘം കിഴക്കൻ യു.പിയിലെ മൗ ജില്ലയിലെ രാജീവ്​ റായ്​യുടെ വീട്ടിലെത്തി പരിശോധന ആരംഭിക്കുകയായിരുന്നു. കർണാടകയിലെ നിരവധി വിദ്യാഭ്യാസ സ്​ഥാപനങ്ങളുടെ ഉടമയാണ്​ റായ്​.

സമാജ്​വാദി പാർട്ടി നേതാവ്​ അഖിലേഷ്​ യാദവിനെ ലക്ഷ്യംവെച്ചാണ്​ ആദായ നികുതി വകുപ്പിന്‍റെ പരിശോധന. തെരഞ്ഞെടുപ്പ്​ മുന്നിൽ കണ്ടാണ്​ നടപടിയെന്ന്​ എസ്​.പി നേതാക്കൾ പ്രതികരിച്ചു.

'തെരഞ്ഞെടുപ്പ്​ അടുക്കു​േമ്പാൾ ഇതെല്ലാം സംഭവിക്കുമെന്ന്​ വീണ്ടും ആവർത്തിക്കുന്നു. ഇപ്പോൾ ആദായ നികുതി വകുപ്പ്​ വന്നു, എൻഫോഴ്​സ്​മെന്‍റ്​ ഡയറക്​ടറേറ്റ്​ വരും, ഇനി സി.ബി.ഐയും വരും. പക്ഷേ സൈക്കിൾ (സമാജ്​വാദി പാർട്ടിയുടെ തെരഞ്ഞെടുപ്പ്​ ചിഹ്​നം) നിൽക്കില്ല. അതിനെ നിർത്താൻ സാധിക്കില്ല. യു.പിയിൽനിന്ന്​ ബി.ജെ.പിയെ തുടച്ചുനീക്കും. സംസ്​ഥാനത്തെ ജനങ്ങൾ മണ്ടൻമാരല്ല. എന്തുകൊണ്ട്​ ഒരു മാസംമുമ്പ്​ രാജീവ്​ റായ്​യുടെ വസതികളിൽ പരിശോധന നടത്തിയില്ല. ഇപ്പോൾ എന്തുകൊണ്ട്​ നടത്തുന്നു? കാരണം തെരഞ്ഞെടുപ്പ്​ അടുത്തുവരുന്നു. ബി.ജെ.പിയും കോൺഗ്രസിന്‍റെ പാതയിലാണ്​. നേരത്തേ കോൺഗ്രസ്​ ആരെയെങ്കിലു​ം ഭയപ്പെടുത്താനായി ഇത്തരം തന്ത്രങ്ങൾ പ്രയോഗിച്ചു. അവരുടെ പാത ഇപ്പോൾ ബി.ജെ.പിയും പിന്തുടരുന്നു -അഖിലേഷ്​ യാദവ്​ പറഞ്ഞു. തെരഞ്ഞെടുപ്പിന്​ തൊട്ടുമുമ്പ്​ എന്തിനാണ്​ ഈ പരിശോധനകൾ. തെരഞ്ഞെടുപ്പ്​ പോരാട്ടത്തിൽ നികുതി വകുപ്പും പ​ങ്കെടുക്കുന്നതായി തോന്നുന്നു' -അഖിലേഷ്​ യാദവ്​ കൂട്ടിച്ചേർത്തു.

​പരിശോധനക്കെതിരെ രാജീവ്​ റായ്​യു​ം രംഗത്തെത്തി. ക്രിമിനൽ പശ്ചാത്തലമോ കള്ളപ്പണ ഇടപാടോ തനിക്കില്ലെന്നും ജനങ്ങളെ സഹായിക്കുകയാണ്​ ചെയ്യുന്നതെന്നും രാജീവ്​ റായ്​ പ്രതികരിച്ചു. ബി.ജെ.പി സർക്കാർ ജനങ്ങ​െള സഹായിക്കുന്നില്ല. അതാണ്​ പരി​ശോധനക്ക്​ കാരണം. അനാവശ്യമായി കേസുകളിൽ ഉൾപ്പെടുത്തി കുരുക്കിയിടാനാണ്​ ശ്രമമെന്നും രാജീവ്​ റായ്​ പറഞ്ഞു. 2014ൽ ഗോസി മണ്ഡലത്തിൽനിന്ന്​ ലോക്​സഭയിലേക്ക്​ മത്സരിച്ച വ്യക്തിയാണ്​ രാജീവ്​ റായ്​.

അഖിലേഷ്​ യാദവിന്‍റെ അടുത്ത അനുയായിയായ മനോജ്​ യാദവിന്‍റെ വീട്ടിലും ഓഫിസിലു​ം ആദായ നികുതി വകുപ്പ്​ പരിശോധന നടത്തുന്നുണ്ട്​. ആർ.സി.എൽ ഗ്രൂപ്പ്​ കമ്പനിയുടെ പ്രമോട്ടറാണ്​ മനോജ്​ യാദവ്​.