ആദായ നികുതി പരിശോധന: പ്രതികരണവുമായി ബി.ബി.സി

ന്യൂഡൽഹിയിലെയും മുംബൈയിലെയും തങ്ങളുടെ ഓഫിസുകളിൽ ആദായനികുതി ഉദ്യോഗസ്ഥർ നടത്തുന്ന പരിശോധനയിൽ പ്രതികരണവുമായി ബി.ബി.സി അധികൃതർ. ‘‘ആദായനികുതി ഉദ്യോഗസ്ഥർ നിലവിൽ ന്യൂഡൽഹിയിലെയും മുംബൈയിലെയും ബി.ബി.സി ഓഫിസുകളിലുണ്ട്. ഞങ്ങൾ പൂർണമായി സഹകരിക്കുന്നു. ഈ സാഹചര്യം എത്രയും വേഗം മാറുമെന്ന് ഞങ്ങൾ പ്രതീക്ഷിക്കുന്നു’’, എന്നിങ്ങനെയായിരുന്നു ട്വിറ്ററിലൂടെയുള്ള പ്രതികരണം.

ക്രമക്കേട് ആരോപിച്ചാണ് ആദായനികുതി ഉദ്യോഗസ്ഥർ ഓഫിസുകളിൽ പരിശോധനക്കെത്തിയത്. മാധ്യമപ്രവർത്തകർ ഉൾപ്പെടെയുള്ള ജീവനക്കാരുടെ ഫോണുകൾ പിടിച്ചെടുത്തതായി റിപ്പോർട്ടുകളുണ്ടായിരുന്നു. ഡൽഹിയിൽ കസ്തൂർബ ഗാന്ധി മാർഗിലെയും മുംബൈയിൽ സാ​ന്റ ക്രൂസിലെയും ഓഫിസുകളിലായിരുന്നു പരിശോധന.

ബി.ബി.സി സംപ്രേഷണം ചെയ്ത 'ഇന്ത്യ: ദി മോദി ക്വസ്റ്റ്യൻ' ഡോക്യുമെന്‍ററി വൻ വിവാദങ്ങൾക്ക് വഴിവെച്ചിരുന്നു. 2002ലെ ഗുജറാത്ത് വംശഹത്യയിൽ മോദിക്ക് നേരിട്ട് ഉത്തരവാദിത്തമുണ്ടെന്ന് ചൂണ്ടിക്കാട്ടുന്നതായിരുന്നു ഡോക്യുമെന്‍ററി. ഇതേത്തുടർന്ന് ഹിന്ദുത്വ കേന്ദ്രങ്ങൾ ബി.ബി.സിക്കെതിരെ വ്യാപക പ്രചാരണം നടത്തുന്ന പശ്ചാത്തലത്തിലാണ് ആദായനികുതി പരിശോധന. പരിശോധനക്കെതിരെ കോൺഗ്രസ് ഉൾപ്പെടെയുള്ള പ്രതിപക്ഷ കക്ഷികൾ രംഗത്തെത്തിയിട്ടുണ്ട്.