തമിഴ്നാട്ടിൽ ലോക്ഡൗൺ ആഗസ്റ്റ്​ 23 വരെ നീട്ടി

ഗൂഡല്ലൂർ: തമിഴ്നാട്ടിൽ രണ്ടാഴ്ചത്തേക്ക് കൂടി ലോക്ഡൗൺ നീട്ടി സർക്കാർ ഉത്തരവിറക്കി. കൂടുതൽ ആളുകൾ ചേരുന്ന സ്ഥലങ്ങളിൽ രോഗവ്യാപനം കൂടാൻ സാധ്യതയുണ്ടെന്ന മുന്നറിയിപ്പിനെ തുടർന്ന് വെള്ളി, ശനി, ഞായർ ദിവസങ്ങളിൽ ആരാധനാലയങ്ങൾ തുറക്കരുതെന്നാണ് ഉത്തരവ്. തിങ്കളാഴ്ച രാവിലെ വരെ ഏർപ്പെടുത്തിയ ലോക്ഡൗൺ ആഗസ്റ്റ്​ 23 രാവിലെ ആറ്​ വരെ തുടരും.

അതേസമയം, മെഡിക്കൽ, നഴ്സിങ് ക്ലാസുകൾ ആഗസ്റ്റ് 15ന് തുടങ്ങും. ഓൺലൈൻ പഠനം കുട്ടികളുടെ മനോനില ബാധിക്കുന്നതായും പലർക്കും പഠനം കൃത്യമായി ലഭ്യമാവാത്ത സാഹചര്യത്തിൽ ഒമ്പത്​ മുതൽ പ്ലസ്ടു വരെയുള്ള ക്ലാസുകൾ മാത്രമാണ് തുടങ്ങുകയെന്നും അധികൃതർ വ്യക്തമാക്കി.

മറ്റ് നിയന്ത്രണങ്ങൾ കോവിഡ് വ്യാപന തോത് കണക്കിലെടുത്ത് ജില്ല ഭരണകൂടങ്ങൾക്ക് തീരുമാനിക്കാമെന്ന്​ മുഖ്യമന്ത്രി എം.കെ. സ്റ്റാലിന്‍റെ അധ്യക്ഷതയിൽ ചേർന്ന യോഗത്തിൽ തീരുമാനിച്ചു.