ആധാർ കാർഡില്ലെന്ന്​ ആരോപിച്ച്​ മുസ്​ലിം കച്ചവടക്കാരന്​ ക്രൂരമർദനം

ന്യൂഡൽഹി: മധ്യപ്രദേശിലെ ദേവാസിൽ തിരിച്ചറിയൽ രേഖയായി ആധാർ കാർഡ്​ കാണിച്ചുനൽകിയില്ലെന്ന പേരിൽ 45കാരനായ മുസ്​ലിം കച്ചവടക്കാരന്​​ ക്രൂരമർദനം. വ്യാഴാഴ്ചയാണ്​ സംഭവം.

സഹീർ ഖാനാണ്​ ക്രൂരമർദനമേറ്റത്​. അംലതാസ്​ ​സ്വദേശിയാണ്​ ഇദ്ദേഹം. 60 കിലോമീറ്റർ അകലെയുള്ള ദേവാസ്​ നഗരത്തിൽ ബിസ്​ക്കറ്റ്​ കച്ചവടമാണ്​ സഹീർ ഖാന്‍റെ തൊഴിൽ. വ്യാ​ഴാഴ്ച രണ്ടുപേർ സഹീറിന്‍റെ സമീപമെത്തുകയും ആക്രോശിച്ച ശേഷം ആധാർ കാർഡ്​ ആവശ്യപ്പെടുകയുമായിരുന്നു. എന്നാൽ ആധാർ വീട്ടിലായിരുന്നതിനാൽ സഹീറിന്​ കാണിക്കാൻ കഴിഞ്ഞില്ല. തുടർന്ന്​ വടിയും ബെൽറ്റും ഉപയോഗിച്ച്​ സഹീറിനെ മർദിക്കുകയായിരുന്നു. ഇദ്ദേഹത്തിന്‍റെ കൈയ്​ക്കും കാലിനും പരിക്കേറ്റു.

മർദനത്തെ തുടർന്ന്​ സഹീർ ഖാൻ പ്രദേശത്തെ പൊലീസ്​ സ്​റ്റേഷനിൽ പരാതി നൽകി. പ്രദേശത്ത്​ ഇനി കച്ചവടം നടത്തരുതെന്നും വീണ്ടും ഇവിടെ വരരുതെന്നും ഇരുവരും ഭീഷണി മുഴക്കിയതായും സഹീറിന്‍റെ പരാതിയിൽ പറയുന്നു. സംഭവത്തിന്​ നിരവധി പേർ സാക്ഷിയായിരുന്നുവെങ്കിലും ആരും തന്നെ സഹായിക്കാൻ ശ്രമിച്ചില്ലെന്നും പരാതിയിലുണ്ട്​. മർദിച്ചവരുടെ പേരുവിവരങ്ങൾ അറിയില്ലെങ്കിലും പ്രതികളെ കണ്ടാൽ തിരിച്ചറിയാൻ കഴിയുമെന്ന്​ സഹീർ ഖാൻ പറഞ്ഞതായി അഡീഷനൽ പൊലീസ്​ സൂപ്രണ്ട്​ സൂര്യകാന്ത വർമ പറഞ്ഞു.

അ​േന്വഷണത്തിൽ ബോർലി സ്വ​േദശികളാണ്​ പ്രതികളെന്ന്​ പൊലീസ്​ കണ്ടെത്തി. അക്രമത്തിൽ ഉൾപ്പെട്ട പ്രതികൾക്കെതിരെ കർശന നടപടി സ്വീകരിക്കുമെന്ന്​ പൊലീസ്​ പറഞ്ഞു.