20ഗ്രാമിന്‍റെ സ്വർണമാസ്​ക്, കൈകളിൽ സാനിറ്റൈസറും മാസ്​കും; കൊൽക്കത്തയിൽ ദുർഗ പ്രതിമ നാടിന്​ സമർപ്പിച്ചു

കൊൽക്കത്ത: 20 ഗ്രാമിന്‍റെ സ്വർണ മാസ്​കും കൈകളിൽ സാനിറ്റൈസറും മാസ്​കും തെർമൽ ഗണ്ണും പിടിച്ച ദുർഗ വിഗ്രഹം നാടിന്​ സമർപ്പിച്ചു. കൊൽക്കത്തയിലെ ബാഗുയതി പ്രദേശത്ത്​ പൂജ പന്തലിലാണ്​ വിഗ്രഹം ഒരുക്കിയിരിക്കുന്നത്​. ഞായറാഴ്ച വിഗ്രഹം നാടിന്​ സമർപ്പിച്ചു.

സാധാരണയുള്ള ദുർഗ വിഗ്രഹത്തിൽനിന്ന്​ വ്യത്യസ്​തമായി തെർമൽ ഗൺ, സാനിറ്റൈസർ, സിറിഞ്ച്​, മറ്റു മെഡിക്കൽ ഉപകരണങ്ങൾ തുടങ്ങിയവ വിഗ്രഹത്തിന്‍റെ കൈകളിൽ കാണാം. കൂടാതെ മുഖത്ത്​ 20ഗ്രാമിന്‍റെ മാസ്​കും ധരിപ്പിച്ചിട്ടുണ്ട്​.

ആഗോള മഹാമാരി പ്രതിസന്ധിയിൽ സുരക്ഷിതമായിരിക്കേണ്ടതിന്‍റെ പ്രധാന്യം വിവരിക്കുന്നതിനാണ്​ പൂജ സംഘാടകരുടെ വ്യത്യസ്​തമായ പരിശ്രമം.

സ്വർണമാസ്​ക്​ ഉയർന്ന നിലവാരമുള്ള ഒന്നു മാത്രമായി പരിഗണിക്കരുതെന്നായിരുന്നു തൃണമൂൽ എം.എൽ.എയും ബംഗാളി ഗായികയുമായ അതിഥി മുൻഷിയുടെ പ്രതികരണം.

20 ഗ്രാം സ്വർണ മാസ്​ക്​ പ്രതിഷ്​ഠിക്കുകയല്ല, മറിച്ച്​ മാസ്​ക്​ ധരിക്കേണ്ടതിന്‍റെയും ശുചിയായിരിക്കേണ്ടതിന്‍റെയും പ്രധാന്യം ഇതുവഴി ഓർമിപ്പിക്കുകയാണ്​ ലക്ഷ്യമെന്നും അവർ കൂട്ടിച്ചേർത്തു.