പുതിയ വാക്സിൻ നയം: ജനസംഖ്യയും കോവിഡ്​ വ്യാപനവും അടിസ്ഥാനമാക്കി സംസ്ഥാനങ്ങൾക്ക്​ വാക്​സിൻ നൽകും

ന്യൂഡൽഹി: പുതിയ വാക്​സിൻ നയം പ്രഖ്യാപിച്ചതിന്​ പിന്നാലെ ഇതിനുള്ള മാർഗനിർദേശങ്ങൾ പുറത്തിറക്കി കേന്ദ്രസർക്കാർ. ജനസംഖ്യയും കോവിഡ്​ വ്യാപനത്തി​െൻറ തോതും അടിസ്ഥാനമാക്കിയാവും സംസ്ഥാനങ്ങൾക്ക്​ വാക്​സിൻ വിതരണം ചെയ്യുക. വാക്​സിൻ പാഴാക്കിയാൽ അത്​ സംസ്ഥാനങ്ങളുടെ ക്വാട്ടയെ നെഗറ്റീവായി സ്വാധീനിക്കും. ജൂൺ 21 മുതൽ പുതിയ നയം നടപ്പാക്കി തുടങ്ങുമെന്നും കേന്ദ്രസർക്കാർ അറിയിച്ചു.

ആരോഗ്യപ്രവർത്തകർ, മുൻനിര പോരാളികൾ, 45 വയസിന്​ മുകളിലുള്ളവർ, രണ്ടാം ഡോസ്​ ലഭിക്കാനുള്ളവർ എന്നിവർക്കാവും വാക്​സിനേഷനിൽ മുൻഗണന ലഭിക്കുക. 18 വയസിന് മുകളിലുള്ളവരുടെ വാക്​സിനേഷനിൽ സംസ്ഥാനങ്ങൾക്ക്​​ സ്വന്തംനിലക്കും മുൻഗണന ക്രമം നിശ്​ചയിക്കാം. വാക്​സിൻ നിർമാതാക്കൾ ഉൽപാദിപ്പിക്കുന്ന വാക്​സി​െൻറ 25 ശതമാനമാണ്​ സ്വകാര്യ ആശുപത്രികൾക്ക്​ നൽകുക. ഇവയുടെ കാര്യക്ഷമമായ വിതരണത്തിന്​ കേന്ദ്രസർക്കാറി​െൻറ മേൽനോട്ടമുണ്ടാവും. ക​ഴിഞ്ഞ ദിവസമാണ്​ പുതിയ വാക്​സിൻ നയം നടപ്പാക്കുമെന്ന്​കേന്ദ്രസർക്കാർ പ്രഖ്യാപിച്ചത്​.

ചില സംസ്ഥാനങ്ങൾ സ്വന്തംനിലക്ക്​ വാക്​സിൻ വാങ്ങാൻ താൽപര്യം പ്രകടിപ്പിച്ചിരുന്നു. ഇതിനായി കേന്ദ്രസർക്കാറിനെ സമീപിച്ച്​ അവർ അനുമതിയും തേടിയിരുന്നു. തുടർന്നാണ്​ സർക്കാർ വാക്​സിൻ നയം മാറ്റിയത്​. തുടർന്ന്​ 50 ശതമാനം വാക്​സിൻ കേന്ദ്രസർക്കാർ സംസ്ഥാനങ്ങൾക്ക്​ നൽകാനും ബാക്കിയുള്ളത്​ സംസ്ഥാനങ്ങൾക്ക്​ സ്വന്തംനിലക്ക്​ കണ്ടെത്താനുമുള്ള അനുവാദം കൊടുത്തു. എന്നാൽ, സ്വന്തംനിലക്ക്​ വാക്​സിൻ കണ്ടെത്താൻ പരിമിതികളുണ്ടെന്ന്​ ചില സംസ്ഥാനങ്ങൾ അറിയിച്ചിരിക്കുകയാണ്​. സാമ്പത്തികമായ പ്രയാസം അനുഭവിക്കുന്നുണ്ടെന്നും സംസ്ഥാനങ്ങൾ അറിയിച്ചു. തുടർന്നാണ്​ വാക്​സിൻ നയം വീണ്ടും മാറ്റാൻ തീരുമാനിച്ചതെന്ന്​ കേന്ദ്രസർക്കാർ വിശദീകരിച്ചു.

സുപ്രീംകോടതിയിൽ നിന്നും പ്രതിപക്ഷ പാർട്ടികളിൽ നിന്നും വലിയ വിമർശനങ്ങൾ ഉയർന്നതോടെയാണ്​ വാക്​സിൻ നയം മാറ്റാൻ കേന്ദ്രസർക്കാർ തീരുമാനിച്ചത്​. 18 വയസിന്​ മുകളിലുള്ള എല്ലാവർക്കും സൗജന്യമായി വാക്​സിൻ നൽകുമെന്നാണ്​ കേന്ദ്രസർക്കാർ പ്രഖ്യാപനം.