പണമിടപാട്​ തർക്കം: അച്ഛനും മകനും ചേർന്ന്​ ​യുവാവിനെ ബെൻസ്​ കാറിൽ 250 മീറ്ററോളം വലിച്ചിഴച്ചു

ബെംഗളൂരു: പണം നൽകുന്നതുമായി ബന്ധപ്പെട്ട തർക്കത്തിൽ 32കാരനെ പിതാവും മകനും കാറിൽ കെട്ടി 250 മീറ്ററോളം വലിച്ച്​ കൊണ്ടുപോയതായി പരാതി. ഗരുഡചർപാളയത്തിൽ മൊബൈൽ ഷോപ്പ്​ നടത്തുന്ന ജിതേഷ്​ കുമാറിനാണ്​ ദുരനുഭവമു​ണ്ടായത്​.

യു.എസിലെ സർവകലാശാലയിൽ ഗവേഷണം നടത്തുന്ന ശ്രീഹരി ബോഹ്​റ ഏപ്രിൽ 26നാണ്​ തന്‍റെ മൊബൈൽ ഫോൺ സർവീസ്​ ചെയ്യാനായി ജിതേഷ്​ കുമാറിന്‍റെ കടയിലെത്തിയത്​. 12000 രൂപയായിരുന്നു ബിൽ തുക.

'പണം അടക്കാനായി എന്‍റെ ഇ-വാലറ്റ്​ വിവരങ്ങൾ നൽകി. ബില്ലിൽ പരാമാർശിച്ച ബാങ്ക്​ അക്കൗണ്ട്​ നമ്പറിലേക്ക്​ ഏപ്രിൽ 29ന്​ അവർ ഓൺലൈനായി പണം അയച്ചു. എന്നോട്​ പറയാതെയായിരുന്നു അത്​. ആ അക്കൗണ്ടുമായി ബന്ധപ്പെട്ട്​ ചില പ്രശ്​നങ്ങൾ ഉള്ളതിനാൽ പണം എനിക്ക്​ ലഭിച്ചില്ല. ഒരു ദിവസത്തിനകം ബാങ്കുമായി ബന്ധപ്പെട്ട്​ അക്കൗണ്ട്​ ശരിയാക്കിയ ശേഷം മൊബൈൽ ഫോൺ നൽകാമെന്ന്​ ഞാൻ അറിയിച്ചു' -കുമാർ ഒരു ദേശീയ മാധ്യമത്തോട്​ പറഞ്ഞു. ഓൺലൈൻ ക്ലാസ്​ ഉള്ളതിനാൽ പണം കാഷായി നൽകാമെന്ന്​ പറഞ്ഞ്​ ബോഹ്​റയുടെ മാതാവ്​ വിളിക്കുകയായിരുന്നു.

'ഓൺലൈൻ പേയ്​മെന്‍റ്​ വഴി അയച്ച പണം ലഭിച്ചാൽ ഇത്​ മടക്കി നൽകിയാൽ മതിയെന്ന്​ അവർ പറഞ്ഞു. ഫീനിക്​സ്​ മാർക്കറ്റ്​ സിറ്റിക്കടുത്ത്​ വെച്ച്​ ഫോൺ കൈമാറാൻ വരാനായിരുന്നു ബോഹ്​റ പറഞ്ഞത്​. ഏ​പ്രിൽ 30ന്​ ഞാൻ പറഞ്ഞ സ്​ഥലത്ത്​ എത്തിയപ്പോൾ ഒരു ചുവപ്പ്​ ബെൻസ്​ കാറിൽ ബോഹ്​റയും പിതാവും അവിടെയുണ്ടായിരുന്നു. ബോഹ്​റയായിരുന്നു ഡ്രൈവിങ്​ സീറ്റിൽ. തൊട്ടടുത്ത സീറ്റിലായിരുന്നു പിതാവ്​. ഫുട്പാത്തിൽ നിൽക്കുകയായിരുന്ന ​എന്നെ അവന്‍റെ പിതാവ് ശകാരിക്കുകയും അധിക്ഷേപിക്കുകയും ചെയ്ത​ു. അവൻ എന്‍റെ കൈയ്യിൽ നിന്ന് ഫോൺ തട്ടിയെടുത്തു. പക്ഷേ ഞാൻ അത് മുറുകെ പിടിച്ചപ്പോൾ അയാൾ എന്‍റെ വലതു കൈ പിടിച്ച് മകനോട്​ കാർ മുന്നോട്ട്​ നീക്കാൻ പറഞ്ഞു. 250 മീറ്ററോളം എന്നെ വലിച്ചിഴച്ചു. തുടർന്ന് വലതു കാൽ നടപ്പാതയിൽ ഒരു വൈദ്യുത തൂണിൽ തട്ടി താഴെ​ വീണു' -കുമാർ സംഭവം വിവരിച്ചു.

അച്ഛനും മകനും സംഭവ സ്​ഥലത്ത്​ നിന്ന്​ രക്ഷപ്പെട്ടു. പരിക്കേറ്റ കുമാർ വൈകീട്ട്​ പൊലീസ്​ സ്​റ്റേഷനിലെത്തി പരാതി നൽകി.