അസമിൽ എൻ.ഡി.എക്ക്​ തിരിച്ചടി; ബി.പി.എഫ് പാർട്ടി കോൺഗ്രസ്​ സഖ്യത്തിൽ

ഗുവാഹത്തി: തെരഞ്ഞെടുപ്പ്​ പ്രഖ്യാപനത്തിന്​ തൊട്ടുപിന്നാലെ അസമിൽ എൻ.ഡി.എ സഖ്യത്തിൽ വിള്ളൽ. എൻ.ഡി.എയിലെ പ്രമുഖ കക്ഷിയായിരുന്ന ബോഡോലാൻഡ്​ പീപ്പിൾസ്​ ഫ്രണ്ട്​ (ബി.പി.എഫ്​) കോൺഗ്രസിൽ ചേർന്നു. സമാധാനത്തിനും ഐക്യത്തിനും വികസനത്തിനും ബി.പി.എഫ്​ വരുന്ന നിയമസഭ തെരഞ്ഞെടുപ്പിൽ മഹാജത്ത്​ സഖ്യത്തിനൊപ്പം കൈകോർക്കും. ഇനിമുതൽ ബി.ജെ.പിയുമായി യാതൊരു സൗഹൃദമോ സഖ്യമോ ഉണ്ടാകില്ല -ബി.പി.എഫ്​ പ്രസിഡന്‍റ്​ ഹഗ്രാമ മൊഹിലാരി പറഞ്ഞു.

2016ലെ തെരഞ്ഞെടുപ്പിൽ 12 സീറ്റുകൾ ബി.പി.എഫ്​ നേടിയിരുന്നു. അസം സർക്കാറിൽ മൂന്ന്​ മന്ത്രിമാരാണ്​ ബി.പി.എഫിനുണ്ടായിരുന്നത്​.

നേരത്തേ, 2021ലെ നിയമസഭ തെരഞ്ഞെടുപ്പിൽ ബി.പി.എഫുമായി ചേർന്ന്​ പ്രവർത്തിക്കാൻ ബി.ജെ.പിക്ക്​ താൽപര്യമില്ലെന്ന്​ അസം ധനമന്ത്രിയും നോർത്ത്​ -ഈസ്റ്റ്​ ഡെമോക്രാറ്റിക്​ സഖ്യം കൺവീനറുമായ ഡോ. ഹിമന്ത ബിശ്വശർമ പറഞ്ഞിരുന്നു.

അതേസമയം ബി.പി.എഫിന്‍റെ നീക്ക​ത്തെ സ്വാഗതം ചെയ്​ത്​ അസം കോൺഗ്രസ്​ രംഗത്തെത്തി. വരുന്ന തെരഞ്ഞെടുപ്പിൽ കോൺഗ്രസ്​ നേതൃത്വത്തിലുള്ള സഖ്യവും ബി.പി.എഫും ചേർന്ന്​ സംസ്​ഥാനത്ത്​ ബി.ജെ.പിയെ പരാജയപ്പെടുത്തുമെന്ന്​ അവർ കൂട്ടിച്ചേർത്തു.