അസമിൽ 'നോ സി.എ.എ' ഷാൾ ധരിച്ച്​ രാഹുലും കോൺഗ്രസ്​ നേതാക്കളും

ഗുഹാവത്തി: അസമിൽ നിയമ തെരഞ്ഞെടുപ്പ്​ നടക്കാനിരിക്കേ സന്ദർശനം നടത്തുന്ന രാഹുൽ ഗാന്ധിയടക്കമുള്ള കോൺഗ്രസ്​ നേതാക്കൾ ധരിച്ചത്​ സി.എ.എ വിരുദ്ധ ഷാളുകൾ. കേന്ദ്രസർക്കാറിന്‍റെ പുതിയ പൗരത്വ നിയമം ഏറ്റവുമധികം പേരെ ബാധിക്കുന്ന അസമിൽ വിഷയം സജ്ജീവമായി ഉയർത്താനാണ്​ കോൺഗ്രസ്​ ലക്ഷ്യം. രാഹുലിനൊപ്പമുണ്ടായിരുന്ന ഛത്തീസ്​ഗഢ്​ മുഖ്യമന്ത്രി ഭൂപേഷ്​ ഭാഗൽ അടക്കമുള്ളവരും സമാന ​ഷാളാണ്​ ധരിച്ചത്​.

കോൺഗ്രസ്​ അധികാരത്തിൽ വന്നാൽ ഒരുകാരണവശാലും പൗരത്വ ഭേദഗതി നിയമം നടപ്പാക്കില്ലെന്ന്​ രാഹുൽ ഗാന്ധി അസമിലെ ശിവസാഗറിൽ നടന്ന കോൺഗ്രസ്​ റാലിയിൽ വ്യക്തമാക്കി.'ഞങ്ങൾ ധരിച്ച ഷാളിൽ സി.എ.എ എന്ന്​ എഴുതിയത്​ തടഞ്ഞിട്ടുണ്ട്​. അതിനർഥം, സാഹചര്യം എന്ത്​ തന്നെയായാലും സി.എ.എ നടപ്പാക്കില്ല എന്ന്​ തന്നെയാണ്​. 'നാം രണ്ട്​ നമുക്ക്​ രണ്ട്​' ശ്രദ്ധിച്ച്​ കേ​ട്ടോളൂ, സി.എ.എ ഇവിടെ നടപ്പാക്കില്ല. ഒരിക്കലും നടപ്പാക്കില്ല.'' -രാഹുൽ പറഞ്ഞു. കഴിഞ്ഞ ദിവസം ലോക്​സഭയിൽ നടത്തിയ പ്രസംഗത്തിൽ 'മോദി -അമിത് ഷാ, അംബാനി -അദാനി' ബന്ധത്തെകുറിച്ച്​ രാഹുൽ തൊടുത്തുവിട്ട 'നാം രണ്ട്​, നമുക്ക്​ രണ്ട്' ('ഹം ദോ ഹമാരേ ദോ') ​പരാമര്‍ശമാണ്​ അസമിലും അദ്ദേഹം ആവർത്തിച്ചത്​.

അസം കരാറിലെ തത്വങ്ങൾ കോൺഗ്രസ്​ സംരക്ഷിക്കുമെന്നും അതിൽനിന്ന് ഒരിഞ്ച് വ്യതിചലിക്കില്ലെന്നും രാഹുൽ ഗാന്ധി പറഞ്ഞു. "ബി.ജെ.പിയും ആർ‌.എസ്‌.എസും അസമിനെ ഭിന്നിപ്പിക്കാനാണ്​ ശ്രമിക്കുന്നത്​. നരേന്ദ്ര മോദിയെയും അമിത് ഷായെയും ഇത് ബാധിക്കില്ലായിരിക്കും. പക്ഷേ, അസമിനെയും ഇന്ത്യയുടെ മറ്റ് ഭാഗങ്ങളെയും ഇത് പ്രതികൂലമായി ബാധിക്കും. അസമിലെ ജനങ്ങളെ കോൺഗ്രസ് ഒന്നിപ്പിച്ചു. പണ്ട്​ പൊതുയോഗങ്ങളിൽ പ​ങ്കെടുക്കുന്നവർ അക്രമം കാരണം നാട്ടിലേക്ക് മടങ്ങുമോ എന്ന് ഉറപ്പില്ലാത്ത സാഹചര്യമായിരുന്നു" അദ്ദേഹം പറഞ്ഞു.

അസമിലെ തേയില തോട്ടം തൊഴിലാളികളെ ​ചൂഷണം ചെയ്യുന്നത്​ അവസാനിപ്പിക്കുമെന്നും മികച്ച വേതനം ഉറപ്പുവരുത്തുമെന്നും രാഹുൽ കൂട്ടിച്ചേർത്തു. ചടങ്ങിൽ പുൽവാമ രക്തസാക്ഷികളുടെ സ്മരണയ്ക്കായി ആദരാഞ്ജലി അർപ്പിക്കുകയും മൗന പ്രാർഥന നടത്തുകയും ​ചെയ്തു.