1800 രൂപക്ക് വെന്‍റിലേറ്റർ, കണ്ടുപിടിത്തവുമായി ഐ.ഐ.ടി വിദ്യാർഥികൾ

ഭുവനേശ്വർ: കോവിഡ് രോഗികൾക്ക് ആശ്വാസമായി ഐ.ഐ.ടി ഭുവനേശ്വർ വിദ്യാർഥികളുടെ പുതിയ കണ്ടെത്തൽ. ശ്വാസം തടസ്സം അനുഭവിക്കുന്ന രോഗികൾക്ക് കൂടി എളുപ്പം ഉപയോഗിക്കാവുന്ന ചെലവ്കുറഞ്ഞ ഹെൽമെറ്റ് കിറ്റ് വെന്‍റിലേറ്ററാണ് ഇവർ കണ്ടെത്തിയത്. ഏഴോളം വിദ്യാർഥികളുടെ ശ്രമഫലമായാണ് കണ്ടുപിടിത്തം വിജയത്തിലെത്തിയത്.

ഹെൽമെറ്റ് പോലുള്ള ഈ ഉപകരണം തല മുഴുവൻ മൂടാനാവും. ഇതിലേക്ക് പമ്പ് വഴി ഓക്സിജൻ എത്തിച്ചാണ് പ്രവർത്തിപ്പിക്കുന്നത്. ശ്വാസതടസ്സം മൂലം പ്രയാസം നേരിടുന്ന രോഗികൾക്ക് ഏറെ ഉപകാരപ്രദമാകുന്ന ഉപകരമാണിത്. രാജ്യത്തിന്‍റെ വിവിധ ഭാഗങ്ങളിൽ കോവിഡ് രോഗികളായവർക്ക് ആവശ്യമായ വെന്‍റിലേറ്റർ സൗകര്യം ഇല്ലാത്ത പ്രതിസന്ധി ഈ ഉപകരണം എത്തുന്നതോടെ പരിഹരിക്കാനാവുമെന്ന് വിദ്യാർഥികൾ പറയുന്നു.

ശ്വാസതടസ്സം മൂലം പ്രയാസപ്പെടുന്ന രോഗികൾക്ക് കുറഞ്ഞ ചെലവിൽ ലഭ്യമാവുന്ന ഉപകരണം രോഗികൾക്കും ഏറെ ഉപകാരപ്രദാമാകുമെന്നും അവർ കൂട്ടിച്ചേർത്തു.

തലക്കകത്ത് ഹെൽമെറ്റ് പോലെ ഉറപ്പിക്കാവുന്ന ഉപകരണമാണ്. അടിയന്തിര വെന്‍റിലേറ്റർ ആവശ്യമുള്ളപ്പോൾ എളുപ്പം ഉപയോഗിക്കാം. 'ശ്വൻസർ' എന്ന ഈ ഉപകരണത്തിന് 1800 രൂപയോളം മാത്രമേ ചിലവ് വരുന്നുള്ളൂ. കോവിഡ് രോഗികൾക്ക് പി.പി.ഇ കിറ്റിനുള്ളിലും ഇത് നിഷ്പ്രയാസം ഉപയോഗിക്കാനാവും. കട്ടക്കിലെ ആശുപത്രിയിൽ നിലവിൽ ഇതിന്‍റെ പരീക്ഷണം പൂർത്തിയാക്കിയിരുന്നു. പേറ്റന്‍റിനായി അപേക്ഷിച്ച് കാത്തിരിക്കുകയാണിവർ.