ഞങ്ങളും നിസ്സഹായർ; കോവിഡ്​ മരണത്തിൽ പകച്ച്​ സിവിൽ ഉദ്യോഗസ്​ഥർ

ന്യൂഡൽഹി: കഴിഞ്ഞ തിങ്കളാഴ്ചയായിരുന്നു കേന്ദ്രമന്ത്രി പ്രകാശ്​ ജാവ്​ദേക്കറിന്‍റെ പ്രൈവറ്റ്​​ സെക്രട്ടറിയായിരുന്ന 32കാരൻ ആനന്ദ്​ താംപെ കോവിഡ്​ ബാധിച്ച്​ മരണത്തിന്​ കീഴടങ്ങിയത്​. രാജ്യത്ത്​ ഏറ്റവും അവസാനമായി മരണത്തിന്​ കീഴടങ്ങിയ സിവിൽ ഉദ്യോഗസ്​ഥൻ.

താംബെയുടെ മരണത്തിന്​ നാലുദിവസം മുമ്പായിരുന്നു ബിഹാർ ചീഫ്​ സെക്രട്ടറി അരുൺ കുമാർ സിങ്ങിന്‍റെ മരണം. 1985 ബാച്ചിലെ ഐ.എ.എസ്​ ഉദ്യോഗസ്​ഥനായ അദ്ദേഹം പട്​നയിലെ ആശുപത്രിയിൽ കോവിഡ്​ 19 ഗുരുതരമായതിനെ തുടർന്ന്​ മരണത്തിന്​ കീഴടങ്ങുകയായിരുന്നു. ഏപ്രിൽ 14ന്​ ബിഹാർ കേഡറിലുള്ള 2008 ബാച്ചിലെ വിജയ്​ രജ്ഞനെയും കോവിഡ്​ കവർന്നിരുന്നു.

രാജ്യം കോവിഡ്​ രണ്ടാം തരംഗത്തിന്‍റെ ചുഴിയിൽ അകപ്പെട്ടിരിക്കു​േമ്പാൾ രാജ്യത്തിൻറെ ഭരണസംവിധാനത്തെ നിയന്ത്രിക്കുന്ന സിവിൽ ഉദ്യോഗസ്​ഥർ പോലും വിറങ്ങിലിച്ചു നിൽക്കുകയാണെന്നാണ്​ ഇതിലൂടെ ഉയരുന്ന പ്രതികരണം.

രാജ്യത്തി​ന്‍റെ നിലവിലെ സ്​ഥിതി ഭരണകൂട സംവിധാനങ്ങളുടെ തലപ്പത്തിരിക്കുന്നവരെ വരെ പിടിച്ചുകുലു​ക്കുന്നുണ്ട്​. തങ്ങളിൽനിന്ന്​ സ്വന്തം കുടുംബാംഗങ്ങളിലേക്ക്​ രോഗം പകരുമെന്ന ഭീതിയിലാണ്​ ഇവരിൽ പലരും.

മുതിർന്ന ഓഫിസർമാർ മാത്രമല്ല, ജൂനിയർ ഉദ്യോഗസ്​ഥർ വരെ കോവിഡിന്​ മുമ്പിൽ മുട്ടുകുത്തി. നിരവധി കേസുകളിൽ സർക്കാർ ഔപചാരിക സംസ്കാര​ചടങ്ങുകൾ പോലും നടത്താൻ തയാറായി​ട്ടില്ലെന്നും മുതിർന്ന കേന്ദ്രസർക്കാർ ഉദ്യോഗസ്​ഥൻ പറഞ്ഞു.

രോഗവ്യാപനം രൂക്ഷമായി തുടര​ു​േമ്പാൾ പോലും പലരെയും ഓഫിസി​ലെത്താൻ നിർബന്ധിക്കുന്നു. അവരിൽ ഭൂരിഭാഗവും 50നും 55നും ഇടയിൽ പ്രായമുള്ളവരും. രോഗബാധിതരായ ശേഷമാണ്​ ഇവരുടെ മടക്കമെന്നും അദ്ദേഹം കൂട്ടിച്ചേർത്തു.

സർക്കാർ സംവിധാനത്തിൽ ജോലി ചെയ്യുന്ന എത്രപേർക്ക്​ ഇതുവരെ രോഗം ബാധിച്ചു​െവന്ന കണക്കുപോലും കേന്ദ്രസർക്കാർ സൂക്ഷിച്ചിട്ടില്ലെന്ന്​ മറ്റൊരു ഉദ്യോഗസ്​ഥൻ പറയുന്നു. ഒരു സ്വകാര്യ കമ്പനിപോലും തങ്ങളുടെ എത്ര ജീവനക്കാർക്ക്​ കോവിഡ്​ ബാധിച്ചുവെന്ന കണക്കുകൾ സൂക്ഷിക്കും. എന്നാൽ സർക്കാർതലത്തിൽ അത്തരമൊരു സംവിധാനമില്ല. ഉയർന്നുവരുന്ന കണക്കുകൾ മുന്നറിയിപ്പ്​ നൽകുന്നുണ്ടെങ്കിലും ജോലിയുടെ റിപ്പോർട്ടുകൾ മാത്രമാണ്​ അധികൃതർക്ക്​ ആവശ്യമെന്ന്​ മറ്റൊരു ഉദ്യോഗസ്​ഥൻ പറയുന്നു.

രാജ്യത്തെ ജനങ്ങൾ കോവിഡ്​ മൂലം വലയു​േമ്പാൾ തങ്ങൾ ഈ നില വരില്ലെന്നായിരുന്നു വിശ്വാസം. എന്നാൽ ആ ചിന്തകളെല്ലാം മാറിമറിഞ്ഞു. രാജ്യതലസ്​ഥാനത്തുൾപ്പെടെ എല്ലാവരുടെയും വീട്ടിൽ ഒരു കോവിഡ്​ രോഗികളെങ്കിലും ഉണ്ടായിരിക്കും. സർക്കാർ ഉദ്യോഗസ്​ഥർക്ക്​ മാത്രമാണ്​ കോവിഡ്​ വാക്​സിൻ നൽകുന്നത്​. മാതാപിതാക്കളും പങ്കാളികളും കുട്ടികളുമെല്ലാം സുരക്ഷിതരല്ലാത്തതിനാൽ മാനസിക വിഷമവും അനുഭവിക്കുന്നു. രോഗബാധിതരായ ബന്ധുക്കൾക്ക്​ ഒരു ആശുപത്രി കിടക്ക ലഭ്യമാക്കി തരണമെന്ന ആവശ്യവുമായി പലരും ബന്ധപ്പെടും. എന്നാൽ ഒരു സഹായം പോലും ചെയ്​തുനൽകാൻ ഇതുവരെ കഴിഞ്ഞിട്ടില്ല. ആശു​പത്രി പ്രവേശനത്തിന്​ ശ്രമിക്കു​േമ്പാൾ പരാജയപ്പെടുകയാണെന്നും അവർ പറയുന്നു.