നാല്​ റഫാൽ വിമാനങ്ങൾ കൂടി ഇന്ത്യയിൽ; ഫ്രാൻസിൽ ഫ്ലാഗ്​ ഓഫ്​ ചെയ്​ത്​ ഇന്ത്യൻ വ്യോമസേന മേധാവി

പാരിസ്​: നാല്​ റഫാൽ വിമാനങ്ങൾ കൂടി ഇന്ത്യയിലെത്തി. ഫ്രഞ്ച്​ വ്യോമതാവളമായ മെറിനാക്​ ബോർഡോയിൽ ഇന്ത്യൻ വ്യോമസേന മേധാവി എയർ ചീഫ്​ മാർഷൽ ആർ.കെ.എസ്​ ഭദോരിയയാണ്​ വിമാനങ്ങൾ ഫ്ലാഗ്​ ഓഫ്​ ചെയ്​തത്​. അഞ്ചു ദിവസത്തെ സന്ദർശനത്തിന്‍റെ ഭാഗമായി അദ്ദേഹം തിങ്കളാഴ്ച ഫ്രാൻസിലെത്തിയിരുന്നു.

ഇന്ത്യയിലെത്തുന്ന അഞ്ചാം ഗഡുവാണിത്​. ഇതോടെ, രാജ്യത്തെ റഫാൽ വിമാനങ്ങൾ 18 ആയി. ചൈനയുമായി സംഘർഷം നിലനിൽക്കുന്ന ലഡാക്​ അതിർത്തിയിൽ ഇവ ഇന്ത്യ നേരത്തെ പറത്തിയിരുന്നു.

8,000 കിലോമീറ്റർ നിർത്താതെ പറന്നാണ്​ വിമാനങ്ങൾ ഇന്ത്യയിലെത്തിയത്​. ഇടക്ക്​ ഫ്രഞ്ച്​ വ്യോമസേനയും യു.എ.ഇയും സഹകരിച്ച്​ ഇന്ധനം നിറച്ചിരുന്നു.

59,000 കോടിക്ക്​ 36 യുദ്ധ വിമാനങ്ങൾക്കാണ്​ ഇന്ത്യ- ഫ്രാൻസ്​ കരാർ. വർഷാവസാനത്തോടെ മുഴുവൻ വിമാനങ്ങളും എത്തുമെന്നാണ്​ കണക്ക്​.