വാക്​സിനുകൾക്ക്​ തിടുക്കത്തിൽ അനുമതി നൽകി; വാക്​സിൻ സ്വീകരിക്കില്ലെന്ന്​ പ്രശാന്ത്​ ഭൂഷൺ

ന്യൂഡൽഹി: രാജ്യത്ത്​ കോവിഡ്​ പ്രതിരോധ വാക്​സിനുകൾക്ക്​ തിടുക്കത്തിൽ അനുമതി നൽകിയതിനെതിരെ മുതിർന്ന അഭിഭാഷകൻ പ്രശാന്ത്​ ഭൂഷൺ. വാക്​സിനുകൾ ശരിയായ രീതിയിൽ പരിശോധന നടത്താതെ തിടുക്കത്തിൽ അനുമതി നൽകിയെന്നും ഇൗ വാക്​സിനുകളിൽ ഒന്നും താൻ സ്വീകരിക്കില്ലെന്നും ​അദ്ദേഹം ട്വിറ്ററിൽ കുറിച്ചു.

രാജ്യത്തെ കോവിഡ്​ കേസുകൾ കുറഞ്ഞുതുടങ്ങി. നമ്മൾ, പ്രത്യേകിച്ച്​ നഗരങ്ങളിൽ വസിക്കുന്നവർക്ക്​ ആർജിത പ്രതിരോധ ശേഷിയും ലഭിച്ചു. ആരോഗ്യമുള്ളവരെ കോവിഡ്​ ബാധിക്കുന്നില്ല. മരണനിരക്ക്​ ആയിരത്തിൽ ഒന്നുമായി. അതുകൊണ്ടുതന്നെ മതിയായ പരിശോധനകൾ നടത്താതെ വാക്​സിനുകൾക്ക്​ രാജ്യം തിടുക്കത്തിൽ അനുമതി നൽകിയെന്നും അദ്ദേഹം പറഞ്ഞു.

'ഇപ്പോൾ, ഇന്ത്യയിലെ കോവിഡ്​ കേസുകൾ കുത്തനെ കുറയുന്നു. നമ്മൾ, നഗരങ്ങളിലുള്ളവർ ആർജിത പ്രതിരോധ ശേഷി നേടി. ആരോഗ്യമുള്ള ആളുകളെയും കുട്ടികളെയും കോവിഡ്​ ബാധിക്കുന്നില്ല. കോവിഡിന്‍റെ മരണനിരക്ക്​ ആയിരത്തിൽ ഒന്നും. ശരിയായ പരിശോധനകൾക്ക്​ വിധേയമാക്കാതെ വാക്​സിനുകൾക്ക്​ തിടുക്കത്തിൽ അനുമതി നൽകി. ഞാൻ ഈ വാക്​സിനുകൾ എടുക്കില്ല' -പ്രശാന്ത്​ ഭൂഷൺ ട്വീറ്റ്​ ചെയ്​തു.

രാജ്യത്ത്​ വാക്​സിനുകൾക്ക്​ തിടുക്കത്തിൽ അനുമതി നൽകിയ​തിനെതിരെ കോൺഗ്രസ്​ നേതാവ്​ ശശി തരൂർ അടക്കം നിരവധിപേർ രംഗത്തെത്തിയിരുന്നു. കോവാക്​സിന്​ അനുമതി നൽകിയതിനെതിരെയായിരുന്നു പ്രതിഷേധം. കോവാക്​സിന്‍റെ മൂന്നാംഘട്ട പരീക്ഷണങ്ങൾ ഇതുവരെ നടത്തിയിട്ടില്ലെന്നും അതിനാൽ അപകടകരമാണെന്നും അദ്ദേഹം മുന്നറിയിപ്പ്​ നൽകുകയും ചെയ്​തു.

രാജ്യത്ത്​ കോവിഡ്​ വാക്​സിനുകളായ കോവിഷീൽഡിനും കോവാക്​സിനുമാണ് ഡ്രഗ്​സ്​ കൺട്രോളർ ജനറൽ ഓഫ്​ ഇന്ത്യ അനുമതി നൽകിയത്​. രണ്ടു വാക്​സിനുകളുടെയും പരീക്ഷണ ഫലങ്ങൾ സംബന്ധിച്ച വിവരങ്ങൾ ലഭ്യമാക്കിയതായും അടിയന്തര സാഹചര്യങ്ങളിലെ ഉപയോഗത്തിന്​ അനുമതി നൽകുകയുമാണെന്ന്​ ഡ്രഗ്​സ്​ കൺട്രോളർ ജനറൽ ഓഫ്​ ഇന്ത്യ അറിയിക്കുകയായിരുന്നു.