വിമർശനങ്ങളെ സ്വാഗതം ചെയ്യുന്നു; പക്ഷേ അതുണ്ടാവുന്നില്ലെന്ന്​ മോദി

ന്യൂഡൽഹി: വിമർശനങ്ങൾക്ക്​ താൻ വലിയ പ്രാധാന്യം കൊടുക്കാറുണ്ടെന്ന്​ പ്രധാനമന്ത്രി നരേന്ദ്ര മോദി. എന്നാൽ, ഗൗരവകരമായ വിമർശനം ഇപ്പോൾ ഉണ്ടാവുന്നില്ലെന്നും അദ്ദേഹം പറഞ്ഞു. ഒരു മാസികക്ക്​ നൽകിയ അഭിമുഖത്തിലാണ്​ മോദിയുടെ പരാമർശം.

വിമർശനമെന്നത്​ ആരോപണങ്ങൾ മാത്രമായി ചുരുങ്ങിയിരിക്കുന്നു​. വിമർശനം ഉന്നയിക്കുന്നതിന്​ കഠിനാധ്വാനവും ഗവേഷണവും ആവശ്യ​മാണെന്നും മോദി പറഞ്ഞു. ആളുകളെല്ലാം ആരോപണം മാത്രമാണ്​ ഉന്നയിക്കുന്നത്​. വിമർശനം ഉന്നയിക്കാൻ അവർക്ക്​ സമയമില്ലായിരിക്കാം. ഇത്​ മൂലം താൻ വിമർശകരെ മിസ്​ ചെയ്യുകയാണെന്നും മോദി പറഞ്ഞു.

തന്‍റെ ജോലികളെ കൃത്യമായി വിലയിരുത്തുന്നയാൾക്ക്​ അതിനെ കുറിച്ച്​ ആക്ഷേപമുണ്ടാവില്ല. അധികാരത്തിന്‍റെ ലോകത്ത് നിന്ന്​​ എപ്പോഴും മാറിനടക്കാനാണ്​ തനിക്ക്​ താൽപര്യം. ചിലർക്ക്​ പ്രധാനമന്ത്രിപദവും മുഖ്യമന്ത്രിപദവും വലിയ അധികാര കേന്ദ്രങ്ങളായിരിക്കും. എന്നാൽ, തനിക്ക്​ അത്​ നന്മ ചെയ്യാനുള്ള വഴി മാത്രമാണെന്ന്​ മോദി പറഞ്ഞു.

സാഹചര്യങ്ങളുടെ സമ്മർദം കൊണ്ടാണ്​ താൻ രാഷ്​ട്രീയത്തിലെത്തിയത്​. ഗുജറാത്ത്​ മുഖ്യമന്ത്രിയായപ്പോൾ കച്ചിലെ ഭൂകമ്പ ദുരിതബാധിതർക്ക്​ സഹായമെത്തിക്കാനാണ്​ ആദ്യം ശ്രമിച്ചത്​. വാക്​സിൻ വിതരണത്തിൽ ഇന്ത്യ സ്വാശ്രയത്വം കൈവരിച്ചുവെന്നും മോദി കൂട്ടിച്ചേർത്തു.