​'അവരുടെ തന്ത്രത്തെ കുറിച്ച് നേരത്തേ അറിഞ്ഞിരുന്നു' -കുമാരസ്വാമിയുടെ സിംഗപ്പൂർ ട്രിപ്പിനെ കുറിച്ച് ഡി.കെ. ശിവകുമാർ

ബംഗളൂരു: കർണാടകയിലെ കോൺഗ്രസ് സർക്കാരിനെ അട്ടിമറിക്കാൻ സിംഗപ്പൂരിൽ കുതന്ത്രങ്ങൾ നടന്നതായി കർണാടക ഉപമുഖ്യമന്ത്രി ഡി.കെ. ശിവ​കുമാർ. മുൻ മുഖ്യമന്ത്രി എച്ച്.ഡി. കുമാരസ്വാമിയുടെ സിംഗപ്പൂർ സന്ദർശനത്തെ കുറിച്ചുള്ള ചോദ്യങ്ങൾക്ക് പ്രതികരിക്കുകയായിരുന്നു ശിവകുമാർ. സന്ദർശനത്തിന് പിന്നാലെ ബി.ജെ.പി നേതാവും മുൻ മുഖ്യമന്ത്രിയുമായ ബസവരാജ് ബൊമ്മെയുമായി കുമാരസ്വാമി സംയുക്ത പത്രസമ്മേളനം നടത്തിയിരുന്നു.

'​'കുമാരസ്വാമിയുടെ സിംഗപ്പൂർ സന്ദർശന​ത്തെ കുറിച്ച് എനിക്ക് വിവരം ലഭിച്ചിരുന്നു. ബംഗളൂരുവിൽ തന്ത്രങ്ങൾ മെനയുന്നതിന് പകരം അത് പ്രാവർത്തികമാക്കാനാണ് അവർ സിംഗപ്പൂരിലേക്ക് പോയത്. ഞങ്ങൾക്ക് എല്ലാമറിയാം.''-എന്നായിരുന്നു ഡി.കെ.യുടെ പ്രതികരണം. കർണാടക സർക്കാരിനെതിരെ വിവിധ വിഷയങ്ങളിൽ ഒന്നിച്ചു പ്രവർത്തിക്കുമെന്ന് ബസവരാജ് ബൊമ്മെയും കുമാരസ്വാമിയും സംയുക്ത പത്രസമ്മേളനത്തിൽ അറിയിച്ചിരുന്നു. അതേസമയം, ബി.ജെ.പിയുമായോ എൻ.ഡി.എയുമായോ സഖ്യത്തിനില്ലെന്ന് ജെ.ഡി.എസ്​ മുതിർന്ന നേതാവും മുൻ പ്രധാനമന്ത്രിയുമായ എച്ച്.ഡി. ദേവഗൗഡ വ്യക്തമാക്കിയിരുന്നു. പാർട്ടി സ്വതന്ത്രമായി പ്രവർത്തിക്കുമെന്നും മറ്റാരുമായും സഖ്യത്തിനില്ലെന്നും അദ്ദേഹം ഉറപ്പിച്ചുപറഞ്ഞു.