ഭവനങ്ങൾ തകർത്താലും ഭരണഘടന നിലംപരിശാക്കരുത്​ -ജംഇയ്യത്ത്​

ന്യൂഡൽഹി: വീടുകൾ തകർത്ത്​ കളഞ്ഞാലും ഭരണഘടന നിലംപരിശാക്കരുതെന്ന്​ ജംഇയ്യത്തുൽ ഉലമായേ ഹിന്ദ്.​ ബുൾഡോസർ രാജുമായി ബന്ധപ്പെട്ട സുപ്രീംകോടതി നിലപാടിനോട്​ പ്രതികരിക്കുകയായിരുന്നു സംഘടന.

രാജ്യത്തിന്‍റെ വിവിധ ഭാഗങ്ങളിൽ സർക്കാറിനെതിരെ പ്രതിഷേധത്തിനിറങ്ങുന്നവരുടെ വീടുകളും കെട്ടിടങ്ങളും തകർക്കുന്ന ബുൾഡോസർ രാജ്​ വിലക്കണമെന്ന ആവശ്യം ബുധനാഴ്ച സു​പ്രീംകോടതി തള്ളിയതിന്​ പിന്നാലെയാണ്​ ഹരജി സമർപ്പിച്ച ജംഇയ്യത്തുൽ ഉലമായെ ഹിന്ദിന്‍റെ പ്രതികരണം.

രാജ്യത്തിന്‍റെ ഭരണഘടനയും നിയമവാഴ്ചയും ഉയർത്തിപ്പിടിക്കാനാണ്​ ഇതിനെതിരെ സുപ്രീംകോടതിയെ സമീപിച്ചതെന്ന്​ ജംഇയ്യത്തുൽ ഉലമായേ പ്രസിഡന്‍റ്​ മൗലാന മഹ്​മൂദ്​ മദനി വ്യക്​തമാക്കി. കോടതിയിൽ തെളിയിക്കാത്ത കുറ്റത്തിനാണ്​ സർക്കാർ ശിക്ഷ നടപ്പാക്കുന്നത്​. വീടുകൾ പൊളിക്കുന്നതും നിർമിക്കുന്നതുമല്ല ആശങ്ക. രാജ്യത്തിന്‍റെ ഭരണഘടന നിലംപരിശാക്കരുത്​. അതിനായുള്ള നിയമ പോരാട്ടവുമായി മുന്നോട്ടുപോകുകയാണെന്നും അതിനിയും തുടരുമെന്നും മഹ്മൂദ്​ മദനി പറഞ്ഞു.

രാജ്യത്തിന്‍റെ വിവിധ ഭാഗങ്ങളിൽ സർക്കാറിനെതിരെ പ്രതിഷേധത്തിനിറങ്ങുന്നവരുടെ വീടുകളും കെട്ടിടങ്ങളും തകർക്കുന്ന ബുൾഡോസർ രാജ്​ വിലക്കണമെന്ന ജംഇയ്യത്തുൽ ഉലമായെ ഹിന്ദിന്‍റെ ആവശ്യം സു​പ്രീംകോടതി തള്ളിയിരുന്നു. അത്തരമൊരു ഉത്തരവ്​ തങ്ങൾ ഇറക്കിയാൽ അത്​ മുനിസിപ്പൽ അധികാരികളുടെ അവകാശങ്ങളെ ഹനിക്കുമെന്ന്​ പറഞ്ഞാണ്​ ജസ്റ്റിസുമാരായ​ ബി.ആർ ഗവായിയും പി.എസ്​ നരസിംഹയും അടങ്ങുന്ന ബെഞ്ച്​ സ്റ്റേക്ക്​ വിസമ്മതിച്ചത്​.​

ഹരജി സുപ്രീംകോടതി ആഗസ്റ്റ്​ 10ലേക്ക്​ മാറ്റുകയും ചെയ്തു. ജംഇയ്യത്തുൽ ഉലമായേ ഹിന്ദ്​ കേസിൽ കക്ഷി ചേർന്നത് ചോദ്യം ചെയ്ത​ ​സോളിസിറ്റർ ജനറൽ തുഷാർ മേത്ത ഇത്​ വിഷയം വൈകാരികമാക്കാനാണെന്ന്​ ആരോപിച്ചിരുന്നു.