ബി.ജെ.പിയുടെ 'ഏകവത്​കരണ' സ്വ​ഭാവമാണ്​ രാജ്യത്തിന്‍റെ ഏറ്റവും വലിയ ശത്രു -പി. ചിദംബരം

ന്യൂഡൽഹി: ബി.ജെ.പി നയിക്കുന്ന കേന്ദ്രസർക്കാറ​ിന്‍റെ 'ഏകവത്​കരണ' സ്വഭാവമാണ്​ ഇന്ത്യയുടെ ഏറ്റവും വലിയ ശത്രുവെന്ന്​ കോൺഗ്രസ്​ നേതാവ്​ പി. ചിദംബരം. ഗോവയിൽ കോൺഗ്രസിന്‍റെ യോഗത്തിൽ സംസാരിക്കുകയായിരുന്നു അദ്ദേഹം.

രാജ്യത്ത്​ ഏകീകൃത സംസ്​കാരം സൃഷ്​ടിക്കാനുള്ള ബി.ജെ.പിയുടെ കേന്ദ്രസർക്കാറിൻെയും ശ്രമമാണ്​ ഇന്ത്യ നേരിടുന്ന ഏറ്റവും വലിയ ഭീഷണികളിലൊന്നെന്ന്​ അദ്ദേഹം പറഞ്ഞു. 'ഇന്ത്യയെ ഏകീകരിക്കാൻ ആഗ്രഹിക്കുന്ന ശക്തികൾ രാജ്യത്തുണ്ട്​. ഒരു ഭാഷ, ഒരു ജാതി, സംസ്​കാരം, ഒരു ഭക്ഷണരീതി- ഇതെങ്ങനെ നമുക്ക്​ അംഗീകരിക്കാൻ സാധിക്കും? ഞാൻ അത്​ എങ്ങനെ അംഗീകരിക്കണമെന്ന്​ മാത്രമല്ല, എന്തിന്​ സ്വീകരിക്കണം? നിങ്ങൾ എന്തിന്​ അവ അംഗീകരിക്കണം? ഓരോ സംസ്​ഥാനത്തിനും സ്വന്തം ഭാഷയും സംസ്​കാരവും ജീവിതരീതിയും വസ്​ത്രധാരണ രീതിയും കുടുംബജീവിത രീതിയുമെല്ലാമുണ്ട്​. പിന്നെ എന്തിന്​ ഈ ഏകീകൃത രീതി അംഗീകരിക്കണം' -ചിദംബരം ചോദിച്ചു.

'ഇന്ത്യ ഒരു രാജ്യമാണ്​. അതിൽ യാതൊരു സംശയവുമില്ല. നിരവധി സംസ്​ഥാനങ്ങളും സംസ്​കാരങ്ങളും ജീവിതരീതിയും ഭാഷകളും ജാതികളും ഭക്ഷണരീതിയും ചേർന്ന ഒരു രാജ്യ​െമന്നതിൽ അഭിമാനിക്കാം. ഇതിൽ സംഭവിക്കാവുന്ന ഏറ്റവും മോശം കാര്യമാണ്​ ഏകവത്​കരണം' -​അദ്ദേഹം പറഞ്ഞു​.

ഇന്ത്യയെ ഏകീകൃതമാക്കണമെന്ന്​ ഒരു ചെറിയ വിഭാഗം വിശ്വസിക്കുന്നതിനാലാണ്​ ഇവയെല്ലാം. ഇവ നമ്മെ എങ്ങോട്ടാണ്​ നയിക്കുന്നത്​​? ഒരു പാർട്ടിയിൽ എത്തിച്ചേരും, ഒരു നേതാവിലും. ഇന്ത്യ ജനാധിപത്യ രാഷ്​ട്രീയം അവസാനിപ്പിച്ച്​ തെരഞ്ഞെടുക്ക​െപ്പട്ട സ്വോച്ഛാധിപത്യമായി മാറുന്നതിലേക്ക്​ അവ നയിക്കും. ഇന്ത്യയിൽ ഇപ്പോൾ ഒരു തെരഞ്ഞെടുപ്പ്​ ജനാധിപത്യ രാജ്യമല്ല, മറിച്ച്​ ഏകാധിപത്യ രാജ്യമാണെന്ന്​ സൂചിപ്പിക്കുന്ന നിരവധി ചിന്തകരും നിരീക്ഷണ സംഘങ്ങളുമുണ്ടെന്നും അദ്ദേഹം പറഞ്ഞു.

ഒരു സ്വോച്ഛാധിപത്യ രാജ്യത്തിന്​ കീഴിൽ ജീവിക്കാൻ ഞങ്ങൾ ആഗ്രഹിക്കുന്നില്ല. പൊലീസിനെ പേടിക്കാൻ ഞാൻ ആഗ്രഹിക്കുന്നില്ല. സർക്കാരിനെയും ഭയപ്പെടാൻ ആഗ്രഹിക്കുന്നില്ല. ഞാൻ സ്വതന്ത്രനായി ജനിച്ചു, എനിക്ക്​ സ്വതന്ത്രമായി ജീവിക്കണം, എനിക്ക്​ സ്വതന്ത്രനായി മരിക്കണം. ഏകോപനവത്​കരണം ഇന്ത്യയുടെ ഏറ്റവും വലിയ ശത്രുവാണ്​. ഇത്​ പ്രചരിപ്പിക്കുന്നത്​ ബി.ജെ.പിയെന്ന രാഷ്​ട്രീയപാർട്ടിയും -​അദ്ദേഹം കൂട്ടിച്ചേർത്തു.

ഇന്ത്യൻ ചരിത്രത്തിൽനിന്ന്​ ആദ്യ പ്രധാനമന്ത്രി ജവഹൽലാൽ നെഹ്​റുവിന്‍റെ പേര്​ എടുത്തുമാറ്റുന്നത്​ ഫുട്​ബാളിൽനിന്ന്​ ക്രിസ്റ്റ്യാനോ റൊ​ണാൾഡോയുടെ പേരും വ്യോമയാന ചരിത്രത്തിൽനിന്ന്​ റൈറ്റ്​ സഹോദരൻമാരുടെ പേരുകളും എടുത്തുമാറ്റുന്നതുപോലെയാണെന്നും അദ്ദേഹം പറഞ്ഞു. ചരിത്രത്തിൽനിന്ന്​ ആദ്യ പ്രധാനമന്ത്രി ജവഹൽ ലാൽ നെഹ്​റുവിന്‍റെ പേര്​ ഒഴിവാക്കാൻ ശ്രമിക്കുന്നതിനെതിരെയായിരുന്നു ചിദംബരത്തിന്‍റെ വിമർശനം.