തമിഴ്​നാട്​ മുഖ്യമന്ത്രിക്കും സെക്രട്ടറിയേറ്റിനും ബോംബ്​ ഭീഷണി; പിന്നിൽ മാനസിക രോഗിയെന്ന്​ പൊലീസ്​

ചെന്നൈ: തമിഴ്‌നാട് മുഖ്യമന്ത്രി എടപ്പാടി കെ. പളനിസ്വാമിയുടെ വസതിയിലും സെക്രട്ടേറിയറ്റിലും വ്യാജ ബോംബ്​ ഭീഷണി. ചൊവ്വാഴ്ച രാവിലെ 9.40 ഓടെ ഇരുസ്​ഥലങ്ങളിലും ബോംബ് സ്‌ഫോടനം നടക്കുമെന്നായിരുന്നു ​സന്ദേശം. പൊലീസ് കൺട്രോൾ റൂമിലേക്കാണ്​ അജ്​ഞാതൻ ഫോൺ ചെയ്​തത്​. 

വിവരം ലഭിച്ച ഉടൻ ബോംബ് സ്ക്വാഡും ഡോഗ്​ സ്​ക്വാഡും രണ്ട് സ്ഥലങ്ങളിലും കുതിച്ചെത്തി പരിശോധന നടത്തി. എന്നാൽ, ഒന്നും കണ്ടെത്താനായില്ല. തുടർന്ന്​ ഫോൺ ചെയ്​തയാളു​ടെ ടവർ ലൊക്കേഷൻ വില്ലുപുരത്താണെന്ന്​ സ്​ഥിരീകരിച്ച സിറ്റി പൊലീസ്, സ്​ഥലത്ത്​ തെരച്ചിൽ നടത്തി. 

മുമ്പും ഇതുപോലെ ബോംബ്​ ഭീഷണി മുഴക്കിയ വ്യക്തിയാണ്​ ഭീഷണിക്കുപിന്നി​ലെന്ന്​ പൊലീസ്​ പറഞ്ഞു. ഇയാൾ മാനസിക രോഗിയാണെന്ന് സംശയിക്കുന്നതായും മുതിർന്ന പൊലീസ് ഉദ്യോഗസ്ഥൻ മാധ്യമപ്രവർത്തകരോട്​ പറഞ്ഞു.