രാജ്യത്തെ ദുഃഖങ്ങൾക്ക്​ കാരണം ഹിന്ദുത്വവാദികൾ -രാഹുൽ ഗാന്ധി

ന്യൂഡൽഹി: ഹിന്ദുത്വ രാഷ്​ട്രീയത്തെ വീണ്ടും കടന്നാക്രമിച്ച്​ രാഹുൽ ഗാന്ധി. ഹിന്ദുത്വവാദികളാണ്​ പണപ്പെരുപ്പത്തിനും ഇപ്പോഴുള്ള ദുഃഖങ്ങൾക്കും വേദനകൾക്കും കാരണക്കാരെന്ന്​ രാഹുൽ ഗാന്ധി പറഞ്ഞു. അമേഠിയിൽ നടന്ന പൊതുയോഗത്തിൽ സംസാരിക്കുകയായിരുന്നു അദ്ദേഹം.

ഇപ്പോൾ ഹിന്ദുക്കളും ഹിന്ദുത്വവാദികളും തമ്മിലുള്ള യുദ്ധമാണ്​ നടക്കുന്നത്​. ഹിന്ദുക്കൾ സത്യാഗ്രഹത്തിൽ വിശ്വസിക്കുന്നു. എന്നാൽ ഹിന്ദുത്വവാദികൾ സാത്താഗ്രാഹ്​(രാഷ്​ട്രീയ അത്യാഗ്രഹം)ത്തിലാണ്​ വിശ്വസിക്കുന്നതെന്നും അദ്ദേഹം പറഞ്ഞു.

ഞാൻ ഹിന്ദു എന്നതിന്‍റെ അർഥം നിങ്ങൾക്ക്​ പറഞ്ഞു തരാം. സത്യത്തിന്‍റെ പാത മാത്രം പിന്തുടരുന്നയാൾ, ഭയത്തിന്​ കീഴടങ്ങാത്തയാൾ, ഭയത്തെ അക്രമവും വെറുപ്പും ദേഷ്യവുമാക്കി മാറ്റത്തവർ എന്നിവരാണ്​ ഹിന്ദുക്കൾ. മഹാത്​മഗാന്ധി ഇതിനുള്ള ഏറ്റവും നല്ല ഉദാഹരണമാണെന്നും രാഹുൽ ഗാന്ധി പറഞ്ഞു.

പ്രിയങ്ക ഗാന്ധിയോടൊപ്പം ആറ്​ കിലോ മീറ്റർ ദൈർഘ്യമുള്ള പദയാത്രയിൽ പ​ങ്കെടുത്തതിന്​ ശേഷമായിരുന്നു രാഹുൽ ഗാന്ധിയു​െട പ്രസ്​താവന. തന്‍റെ കുടുംബവും അമേഠിയും തമ്മിലുള്ള ബന്ധം ഒരിക്കലും തകർക്കാനാവില്ലെന്ന്​ രാഹുൽ ഗാന്ധി പറഞ്ഞു. 2004ൽ ഞാൻ ആദ്യമായി ഇവിടെ വന്നപ്പോൾ നിങ്ങൾ എ​ന്നെ സ്​നേഹമെന്താണെന്നും രാഷ്​ട്രീയമെന്താണെന്നും പഠിപ്പിച്ചുവെന്നും അദ്ദേഹം കൂട്ടിച്ചേർത്തു. ലോക്​സഭ തെരഞ്ഞെടുപ്പിൽ പരാജയപ്പെട്ടതിന്​ ശേഷം ഇതാദ്യമായാണ്​ രാഹുൽ ഗാന്ധി അമേഠിയിലെത്തുന്നത്​.

ഗംഗയിൽ സ്​നാനം നടത്തിയ മോദി ​തൊഴിലില്ലായ്​മയടക്കമുള്ള പ്രശ്​നങ്ങളെ കുറിച്ച്​ മൗനം പാലിക്കുകയാണ്​ ചെയ്​തതെന്നും രാഹുൽ ഗാന്ധി കുറ്റപ്പെടുത്തി. സുപ്രധാനവിഷയങ്ങളിൽ നിന്നും ശ്രദ്ധതിരിക്കാനുള്ള ശ്രമമാണ്​ സർക്കാർ നടത്തുന്നതെന്നും അദ്ദേഹം പറഞ്ഞു.