ഔറംഗസേബ് അനുകൂല വാട്‌സാപ്പ് സ്റ്റാറ്റസ്​; മുസ്​ലിം കുടുംബത്തെ നാടുകടത്തണമെന്ന് ഹിന്ദുത്വ തീവ്രവാദ സംഘടനകൾ

മുഗൾ ചക്രവർത്തി ഔറംഗസേബിനെ അനുകൂടലിച്ച്​ വാട്‌സാപ്പ് സ്റ്റാറ്റസ് ഇട്ടതിന്‍റെ പേരിൽ കഴഞ്ഞ ദിവസം മഹാരാഷ്ട്രയിൽ മുസ്​ലിം യുവാവ്​ അറസ്റ്റ്​ ചെയ്യപ്പെട്ടിരുന്നു. ഇതിന്​ പിന്നാലെ യുവാവിന്‍റെ കുടുംബത്തെ നാടുകടത്തണം എന്ന ആവശ്യവുമായി ഹിന്ദുത്വ തീവ്രവാദ സംഘടനകൾ രംഗത്തുവന്നുകഴിഞ്ഞു. ഈ ആവശ്യം ഉന്നയിച്ച്​ ഹിന്ദുത്വ ഗ്രൂപ്പുകൾ സവർദെ ഗ്രാമത്തിൽ റാലി നടത്തി. ഔറംഗബാദ് നഗരത്തിന്റെ പേരുമാറ്റവുമായി ബന്ധപ്പെട്ടാണ്​ മുഹമ്മദ്​ മുഅ്​മിൻ എന്ന യുവാവ്​ മുഗൾ ഭരണാധികാരി ഔറംഗസേബിനെ വാട്​സാപ്പ്​ സ്റ്റാറ്റസ്​ ആക്കിയത്​. ഇത്​ ഹിന്ദുത്വ തീവ്രവാദ സംഘടനകളും തീവ്ര വലതുപക്ഷ മാധ്യമങ്ങളും വലിയ വാർത്തയാക്കുകയായിരുന്നു. മുഅ്​മിനെതിരെ കർശന നടപടി ആവശ്യപ്പെട്ടാണ്​ ഹിന്ദുത്വവാദികൾ കുത്തിയിരുപ്പ്​ സമരം അടക്കം നടത്തിയത്​.

ഗ്രാമത്തിലെ സർപഞ്ച് മുഅ്​മിന്റെ കുടുംബത്തെ പുറത്താക്കണമെന്ന് ആവശ്യപ്പെട്ട് ഹിന്ദുത്വ സംഘടനകൾ ബൈക്ക് റാലി നടത്തി. കുടുംബം എന്നെന്നേക്കുമായി ഗ്രാമം വിട്ടുപോകണമെന്ന് അവർ മുദ്രാവാക്യം വിളിച്ചു.പ്രകോപിതരായ ഹിന്ദുത്വ സംഘടന പ്രവർത്തകർ മുഅ്​മിന്റെ ഒരു ബന്ധുവിന്റെ ഉടമസ്ഥതയിലുള്ള പഞ്ചസാര ചാക്ക് ഗോഡൗണും ടെമ്പോയും കത്തിച്ചു. തുടർന്ന് അവർ വഡ്ഗാവ് പൊലീസ് സ്റ്റേഷനിലെത്തി മുഅ്​മിനെതിരെ രാജ്യദ്രോഹക്കുറ്റം ചുമത്തണമെന്ന് ആവശ്യപ്പെട്ട് പ്രകടനം നടത്തി. സവാർദേയിലും സമീപ ഗ്രാമങ്ങളായ മിഞ്ചെ, പേത്ത് വഡ്ഗാവ് എന്നിവിടങ്ങളിലും സംഘർഷാവസ്ഥ ഉടലെടുത്തിട്ടുണ്ട്​.