വീട്ടിൽ ക്രിസ്മസ്​ ആഘോഷിക്കുന്നത്​ തടഞ്ഞ്​ ഹിന്ദുത്വ തീവ്രവാദികൾ; ഇറങ്ങിപ്പോകാൻ പറഞ്ഞ്​ സ്ത്രീകൾ - വൈറൽ വിഡിയോ

ബംഗളൂരു: കർണാടകയിൽ ക്രിസ്ത്യൻ സമൂഹത്തിന്​ നേരെ ഹിന്ദുത്വ തീവ്രവാദികളുടെ ആക്രമണം തുടരുന്നു. വീട്ടിൽ ക്രിസ്മസ്​ ആഘോഷിക്കുന്നത്​ തടഞ്ഞതാണ്​ ഒടുവിലത്തെ സംഭവം. വീട്ടിലേക്ക്​ ഇരച്ചെത്തിയ ആളുകളോട്​ സ്ത്രീകൾ വഴക്കിടുന്നതിന്‍റെയും ഇറ​ങ്ങിപ്പോകാൻ പറയുന്നതിന്‍റെയും വിഡിയോ സാമൂഹിക മാധ്യമങ്ങളിൽ വൈറലായി.

ക്രിസ്മസ് കഴിഞ്ഞ് മൂന്ന് ദിവസത്തിന് ശേഷം ചൊവ്വാഴ്ച തുംകൂരിലാണ്​ സംഭവം. ഒ.ബി.സി സമുദായത്തിൽ നിന്നുള്ള കുടുംബത്തിന്‍റെ വീട്ടിലേക്കാണ്​ ഒരുകൂട്ടം ബജ്​റംഗ്​ ദൾ പ്രവർത്തകർ അതിക്രമിച്ചു കയറിയത്​.

എന്തുകൊണ്ടാണ് കുടുംബം ക്രിസ്മസ് ആഘോഷിക്കുന്നതെന്നും ഹിന്ദു സ്ത്രീകൾ ചെയ്യുന്നതുപോലെ സിന്ദൂരം ചാർത്താത്തത്​ എന്തുകൊണ്ടാണെന്നും അവർ ചോദിച്ചു. 'നിങ്ങൾ എന്തിനാണ് ക്രിസ്​മസ് ആഘോഷിക്കുന്നത്?' കൂട്ടത്തിലുള്ള ഒരാൾ ചോദിക്കുന്നത്​ വിഡിയോയിൽ കാണാം. എന്തുകൊണ്ടാണ് കുടുംബത്തിലെ ചിലർ ക്രിസ്റ്റാനിറ്റിയിലേക്ക്​ പരിവർത്തനം ചെയ്തതെന്നും അയാൾ ചോദിക്കുന്നുണ്ട്​.

എന്നാൽ, മതപരിവർത്തന ആരോപണം നിഷേധിക്കുന്ന സ്ത്രീകൾ, ആ​രോട്​ പ്രാർത്ഥിക്കണമെന്നത്​ ഞങ്ങളുടെ അവകാശമാണെന്ന്​ ഹിന്ദുത്വ തീവ്രവാദികളോട്​ പറയുന്നുണ്ട്​. 'ഞങ്ങളെ ചോദ്യം ചെയ്യാൻ നിങ്ങൾ ആരാണ്? ഞാൻ മംഗളസൂത്രം ഊരി മാറ്റിവെയ്ക്കാം' -സ്ത്രീകളിൽ ഒരാൾ പറഞ്ഞു. സംഘത്തോട്​ വീട്ടിൽനിന്ന്​ ഇറങ്ങി​​പ്പോകാനും ഇവർ ആവശ്യപ്പെട്ടു.

തർക്കം അൽപനേരം നീണ്ടുനിന്നെങ്കിലും ഒടുവിൽ പൊലീസിനെ വിളിച്ചതോടെയാണ്​ തർക്കം അടങ്ങിയത്​. അതേസമയം, ഇവർ ഔദ്യോഗികമായി പരാതി നൽകിയിട്ടില്ല. കുടുംബത്തിലെ ചില അംഗങ്ങൾ വർഷങ്ങളായി ക്രിസ്മസ് ആഘോഷിക്കുന്നുണ്ടെന്ന്​ പൊലീസ്​ അറിയിച്ചു.

മതപരമായ അസഹിഷ്ണുത കർണാടകയിൽ വർധിച്ചുവരികയാണ്. ഹിന്ദുത്വ തീവ്രവാദികളുടെ ആക്രമണത്തിനെതിരെ സർക്കാർ നടപടി സ്വീകരിക്കുന്നത്​ കുറവാണ്​. ഇത്​ ഇത്തരം സംഘങ്ങൾക്ക് കൂടുതൽ​ പ്രേരണയാവുന്നു​. കൂടാതെ മതപരിവർത്തനം നിരോധിച്ചുള്ള ബില്ലും കർണാടക നിയമസഭ പാസാക്കിയിരുന്നു​.

കഴിഞ്ഞദിവസം ക്രിസ്മസ്​ ആഘോഷത്തിനിടെ മാംസം വിളമ്പിയെന്ന്​ ആരോപിച്ച് കർണാടകയിൽ​ സ്കൂൾ അടച്ചുപൂട്ടാൻ ഉത്തരവിട്ടിരുന്നു. എന്നാൽ, പിന്നീട്​ വിദ്യാഭ്യാസ വകുപ്പ്​ ഇടപെട്ട്​ ഉത്തരവ്​ റദ്ദാക്കി.