'ഹിന്ദു പ്രദേശത്ത്'​ കച്ചവടം നടത്തിയതിന്​ മുസ്​ലിം യുവാവിന്​ ക്രൂര മർദനം, ന്യായീകരിച്ച്​ ബി.ജെ.പി മന്ത്രി VIDEO

ഭോപ്പാൽ: ഹിന്ദു ഭൂരിപക്ഷ പ്രദേശത്ത്​ കച്ചവടം നടത്തിയെന്നാരോപിച്ച്​ മുസ്​ലിം യുവാവിന്​ നേരെ ക്രൂര മർദനം. മധ്യപ്രദേശിലെ ഇൻഡോറിനടുത്തുള്ള ഗോവിന്ദ്​ നഗറിൽ വളക്കച്ചവടം നടത്തിയ 25കാരൻ തസ്​ലീമിനുനേരെയാണ്​ ആക്രമണമുണ്ടായത്​. ഞായറാഴ്ചയാണ്​ സംഭവം.

ഹിന്ദു ഏരിയയിൽ ഇനി മേലിൽ വരരുതെന്നും ഞങ്ങളുടെ പെങ്ങൻമാരും പെൺമക്കളും വരുന്നയിടത്ത്​ വള വിൽക്കുകയാണോ എന്നും ചോദിച്ചായിരുന്നു മർദനം. ക്രൂരമായി മർദിച്ച ശേഷം യുവാവിന്‍റെ കച്ചവട സാധനങ്ങളും നശിപ്പിച്ചു.സംഭവത്തിന്‍റെ വിഡിയോ ദൃശ്യങ്ങൾ വ്യാപകമായി പ്രചരിച്ചതോടെ സംഭവം രാഷ്​ട്രീയ വിവാദമായിട്ടുണ്ട്​. സംഭവത്തിൽ പ്രതിഷേധവുമായി കോൺഗ്രസ്​ നേതാവ്​ ഇമ്രാൻ പ്രതാപ്​ഗഢി രംഗത്തെത്തി.

എന്നാൽ സംഭവം വർഗീയ ആക്രമണമല്ലെന്ന വിശദീകരണവുമായി മധ്യപ്രദേശ്​ ആഭ്യന്തര മന്ത്രി നരോട്ടം മിശ്ര രം​ഗത്തെത്തി. മുസ്​ലിം കച്ചവടക്കാരൻ പേര്​ മറച്ചുവെച്ച്​ ഹിന്ദുപേരിൽ കച്ചവടം നടത്തുകയായിരുന്നെന്നും സാവൻ ഉത്സവത്തിന്​ ഞങ്ങളുടെ പെൺമക്കൾ ധരിക്കുന്ന വളകളും ​മെഹന്തിയും വിൽക്കുകയായിരുന്നെന്നും നരോട്ടം മിശ്ര പറഞ്ഞു. അതുകൊണ്ടാണ്​ അക്രമണം ഉണ്ടായതെന്നും വർഗീയ നിറം നൽകരുതെന്നും മിശ്ര കൂട്ടിച്ചേർത്തു. സംഭവത്തിൽ വലിയ പ്രതിഷേധവുമായി ജനങ്ങൾ പൊലീസ്​ സ്​റ്റേഷന്​ പുറത്ത്​ പ്രതിഷേധിച്ചതോടെ പ്രതികൾക്കെതിരെ കേസെടുത്തിട്ടുണ്ട്​.